Folketingi

Video isiginnaaruk: Naalagaaffeqatigiinnerup nalilerneqarnera

Naalagaaffeqatigiinnerup qanoq inissisimanera tallimanngormat Folketingimi oqaluuserineqarpoq. Folketingimut ilaasortap IA-meersup Aaja Chemnitz Larsenip oqalugiarnermini erseqqissaatigaa pitsanngorsaanissanut suli pisariaqartitsisoqartoq

Aaja Chemnitz Larsen oqaluttarfimmi

Oqartussaaffeqarfinni 32-ini, Kalaallit Nunaat sinnerlugu Danmarkip suli tigummisaani pitsanngorsaanissanut suli inissaqarpoq.

Naalagaaffeqatigiinneq tallimanngormat Folketingimi ukiumoortumik oqaluuserineqarmat folketingimut ilaasortaq Inuit Ataqatigiinneersoq Aaja Chemnitz Larsen taamatut erseqqissaavoq.

Kinguaattooqqasut

– Ilaqutariinnut inatsisit eqqarsaatigalugit tamakkua inatsisinit ukiut 50-it sinnerlugit pisoqaassusilinnit kinguaattooqqapput. Tamanna peqatigalugu naalagaaffiup suliffeqarfiisa nutserniarneqarnerisigut Kalaallit Nunaata imartaata ulorianartoqartartut itinersiornissaannik qalllunaat-kalaallit isumaqatigiissutaat ulorianartorsiortinneqarpoq, tamanna maanna isumaqatigiissutigineqarsimasutut 2018-imi naammassineqarsinnaajunnaarmat. Aamma takusinnaavarput nunatta akornanni kileqarfeqarnikkut aporfissaqarlunilu akimmiffissaqartoq, kiisalu kalaallit Danmarkimi najugallit akulerutsinneqarnissaat nukittorsarneqartariaqartoq aammalu qallunaani inuiaqatigiinni Kalaallit Nunaannik annertunerusumik paasinninnissaq ilisimasaqarnissarlu pisariaqartinneqartoq, Aaja Chemnitz Larsen oqarpoq.

Aningaasaliissuteqarnermut aningaasaateqarfik

Tamatuma saniatigut tikkuarpaa inuussutissarsiutitigut ineriartornerup annertusarnissaa, tamatumanilu issittumi aningaasaliissuteqarnermut aningaasaateqarfik pingaaruteqarsinnaavoq.

– Siunissami inuussutissarsiutit ineriartortinnissaannut aningaasaliissuteqartarnissat Kalaallit Nunaata akisussaaffigaa, nunarsuarmili qeqertat annersaattut taama inukitsigigatta nunanit tamalaaneersunik peqateqarnissaq aalajangiisuussaaq. 2015-imi qallunaat naalakkersuisuisa Naalakkersuisuttalu isumaqatigiissutigaat inuussutissarsiutitigut suleqatigiinneq siuarsarneqassasoq. Tamanna eqqarsaatigalugu naleqqulluinnarpoq issittumi aningaasaliissuteqarnermut aningaasaateqarfimmik pilersitsinissaq, taannalu ataatsimoorluni suliniutigineqarsinnaavoq, Aaja Chemnitz Larsen oqarpoq.

Naalagaaffeqatigiinneq pillugu Folketingimi oqallinnerup videokut immiunneqarnera allaaserisap ataani takusinnaavat

Powered by Labrador CMS