Video: Isiginnaartitsisartunik pissarsiorneq

Filmiliaritinnissamut piumassuseqaraanni, maanna Ilulissani periarfissaqalerpoq.

21-innarnik ukiullip Marc Fussing Rosbachip, filmiliasssani 'Tarratta Nunaanni' piviusunngortingajalerpaa.

Misilitsitsineq
Tamatumunnga siunertamut isiginnaartitsisartunik inuttassanik pisariaqartitsivoq, filmiliaritinnissamullu piumassuseqaraanni, taava Ilulissani ulluni makkunani misilitsitsivoq.

Inuusuttoq ilitsersuisartoq angutinik aamma arnanik 40-t 80-illu akornanni ukiulinnik pissarsiorpoq.

Filminik naatsunik misilittagaqartoq
Marc Fussing Rosbach inuusukkaluarluni filminik naatsunik arlalinnik suliaqareerpoq.

Ukiuni kingullerni filmimik aliikkutassiamik suliaqarniarluni takorloortarsimavaa, maannalu qanilliallalluni alloriarpoq.

Novembarimilu filmimut trailerimik saqqummiussivoq, taanna allaaserisap qulaani takuneqarsinnaavoq.

Angakkut ajunngitsut ajortullu
Filmi oqaluttualiat nutaaliaasunut aamma kalaallit oqaluttuatoqaannut tunngassaaq.

Oqaluttuanullu tamakkununnga tunngasut allat assigalugit, tassa ajortut ajunngitsullu akerleriinnerannut tunngasuussaaq.

Uanilu angakkut ajortut nunarsuaq aarlerinartorsiortippaat, angakkuniillu ajunngitsunit illersorneqassaaq.

Isiginnaartitsinermut misileerusukkaanni, taava unnugu, aqqagu aamma aqaguagu, Marc Fussing Rosbach kulturip illorsuani Sermermiuni nalunaaqutaq 17.00 aamma 20.00 akornanni misilitsitsiniarpoq.