Video inuk tammaaneqartoq pillugu nassuernermik imaqartoq misissorneqartoq
Kalaallit Nunaata Politiivisa video nittartakkakkut attaveqatigiiffiusuni siammarneqartaqattaartoq misissorsimavaat. Videomi inuk oqaluttuarpoq nassuerluni, inuk 2014-imi tammaaneqartoq toqussimallugu. Nassuerneq eqqortuunngitsoq, Kalaallit Politiivisa misissuinerata takutippaat.
Video nittartakkakkut attaveqatigiiffiusukkut siammarterneqartoq, angummik ukiut arfinillit matuma siorna toqutsisimalluni nassuernermik imaqarpoq. Angut toqunneqarsimasutut nassuerutigineqartoq 2014-imi tammaaneqalerpoq.
Video nutaarsiassaqartitsivinnut arlalinnut nassiunneqarsimavoq, aamma Sermitsiaq.AG-mut. Sermitsiaq.AG-p video Kalaallit Nunaata Politiivinut sapaatit akunneri marluk matuma siorna ingerlateqqippaa.
Kalaallit Nunaata Politiivisa Sermitsiaq.AG-mut ilisimatitsissutigaa video misissorneqarsimasoq. Paasiniaanerit tassungalu atatillugu killisiuinerit takutippaat, suliami paasissutissat nutaat atorsinnaanngitsut, Kalaallit Nunaata Politiivi ilisimatitsipput.
Videomi nassuerneq eqqortuunngitsoq ilisimatitsissutigineqarpoq. Tamannalu tunngavigalugu angut tammaaneqartoq pillugu suliaq ammaqqinneqassanngitsoq, politiinit nalilerneqarpoq.
Angut videomi eqqaaneqartoq, Preben Nielsen, augustip 15-ani 2014-imi nalunaaqutaq 4.00 missaani kingullermik takuneqarpoq, Aasianni aqqusinikkut Qaqqap Tunuani aamma Killerpaani ingerlasoq. Scooterii saviminernut eqqaavissuarmi kingorna nassaarineqarput.
Preben Nielsen nassaarineqarnikuunngilaq. Suliani taama ittuni ajornartorsiutit annersaraat tammaaneqartup timaa nassaarineqarsimanngimmat, taamaattumillu nassuernerit politiinit nalileruminaatsinneqarsinnaasarmata, Kalaallit Nunaata Politiivi ilisimatitsipput.
Kalaallit Nunaata Politiivi Sermitsiaq.AG-mut ilisimatitsisimapput suliaq december 2016-imi suliaq paasineqarani toqqorneqarsimasoq, suliami paasiniagassat tamakkerlugit paasiniarneqareermata.
