Hollywood
Video: ’Aningaaq’ oqaluttuarisaanermut ilanngussinnaavoq
Filmimi ’Gravity’mi takutinneqarpoq silaannarsualiartartup piniartullu radiokkut oqaloqatigiinnerat taannalu filmiaraliarineqarpoq ’Aningaaq’mik taallugu
Filmi naatsoq ’Aningaaq’ Sandra Bullockimi Orto Ignatiussenimillu inuttaaffigineqartoq Oscarimik nersornaaserneqartussanut ilaanngutassatut innersuunneqarpoq. Filmimik suliarinnittut Warner Home Video taama inassuteqartuussut The Hollywood Reporter allaaserinnippoq.
Piniartut sikumi ningittakkaminik passussitillugu vhf-radioa seqquluppalulerpoq. Sunaaffa silaannarsuarmiit ajunaalernermik nalunaarut mayday piniartorlu isumaliorpoq kalerrisaarisoq Maydayimik atilik.
Scene taanna immiussaavoq filmimi ’Gravity’mi Sandra Bullockip George Clooneyllu pingaarnertut inuttaaffigisaanni.
Pisoq taanna ’Aningaaq’mik taaguuserneqartoq tunumi imaani sikumi immiussaavoq Orto Ignatiussen filmip naatsup ateqaataatut Aningaamik ateqarluni inuttaaffigisaa.
Piniartoq puiaasamik najorsillaataa silaannarsuarmneersumut radiokkut oqalulluni aallartippoq.
Oqaluttuarisaanermut ilannguttoqartussaavoq Aningaaq aamma Gravity Oscarinnattussatut ilanngunneqassappata. Tassami aatsaat siullermeerutaasumik filmip pingaarneq taassumalu ilamernga ataatsikkut innersuunneqartussaassamata tamanna pissappat, The Hollywood Reporter allappoq.
Filmi Orto Ignatiussen kisimi kalaalerpaluttuunngilaq tassami Juaaka Lyberthip sinnassaasiaa ’Sinigit meerannguaq’ aamma tunulequttatut nipilersuutaammat.