Viagra - Ritaliniunngitsoq – nakorsaatit unioqqutitsilluni eqqunneqartartut annersaraat
Ritalin ilanngaaserisunit arsaarinnissutigineqartartoq annikitsuararsuuvoq, Akileraartarnermut Aqutsisoqarfik paasissutissiivoq. Nakorsaatit unioqqutitsilluni eqqunneqartartut annersaat tassavoq Viagra – Naalakkersuisulli nakkutilliinerup annertusinissaanik pilersaaruteqanngillat.
Viagra, nakorsaatitut unioqqutitsilluni eqqunneqartartutut, piumaneqarluarsimagunarpoq.
Nakorsaatit tissassaatitut ilisimaneqarnerusut taakkua nakorsaatini unioqqutitsilluni eqqunneqartartuni ilanngaaserisunillu arsaarinnissutigineqartartuni annertunerpaajupput.
Akileraartarnermut Aqutsisoqarfimmi ilanngaaserisunit aamma maluginiarneqarpoq, nakorsaatit allat soorlu Ritalin annikitsuinnaat paasineqartartut. Kalaallit Nunaanni Politiit Ritalinip unioqqutitsilluni tuniniarneqartartup nakorsanit tunniussaasarsimaneranik eqqoriaanerat taamaalilluni uppernarsarneqarpoq. Ajornartorsiut tamanna Sermitsiaq.AG-p arlaleriarluni allaaserisarsimavaa.
Ilanngaaserisunit paasissutissat Peqqissutsimut Naalakkersuisup Mimi Karlsenip paragraf 37 naapertorlugu apeqqutinut akissutaani atuarneqarsinnaapput.
Nakkutilliinerup annertusineqarnissaa pilersaarutigineqanngilaq
Anna Wangenheim (D), nakorsaatit akuersissuteqaqqaarluni pissarsiarineqarsinnaasut tuniniarneqartarnerat pillugu apeqquteqarsimasoq, maluginiakkani tunngavigalugit allappoq, atornerluineq atornerluisunillu katsorsaasarneq inuiaqatigiinni unammilligassaasoq uteqqiattoq.
Politikeri Demokraatineersoq isumaqarpoq, immikkut eqqumaffigisassaasoq, ukiuni kingullerni takornariaqarnikkut, sulisussaqarnikkut assigisaannillu nunatta avataaniit annertuumik isaasoqarnerulersimanera. Taamaattumik Wangenheimip paaserusuppaa ikiaroornartunik inerteqqutaasunik nakorsaatinillu akuersissuteqaqqaarluni pissarsiarineqarsinnaasunik anngiortumik eqquissuinermut akiuiniarnissamut Naalakkersuisut sunik pilersaaruteqarnersut.
Naalakkersuisulli pilersaaruteqanngillat.
Akileraartarnermut Aqutsisoqarfik ilanngaaserisoqarfimmi ullumikkut arfineq-marlunnik sulisoqarpoq, katillugit arfineq-marlunnik qimmeqarluni.
Naalakkersuisut isumaqarput, inunnik angallatinillu nakkutilliisarnerup annertusinissaa siunertaralugu Akileraartarnermut Aqutsisoqarfiup aningaasaliiffigeqqinnissaa pisariaqanngitsoq, Mimi Karlsen naapertorlugu. Taanna ilassuteqarluni allappoq, nioqqutissanik inunnillu nakkutilliinerup iluani suliniutit isumalluutillu akornanni naammattumik oqimaaqatigiittoqarnissaa qulakkeerniarlugu nakkutilliineq pillugu Akileraartarnermut Aqutsisoqarfiup Naalakkersuisut ingerlaavartumik oqaloqatigisarai.
Læs hele sagen:
-
Pillemisbrug førte til vores søns selvmord
-
Grønlands Politi har fokus på Ritalin
-
Penge i at videresælge ordineret medicin
-
- Det er virkelig nemt at bestille
-
Det skal ikke handle om personer med adhd
-
Forholdet mellem læge og patient er på spil
-
Vi ser desværre, at forældre sælger deres børns adhd-medicin
-
Mimi Karlsen har været opmærksom på muligt misbrug af Ritalin siden efteråret
-
Viagra - og altså ikke Ritalin - er hovedparten af ulovligt indført medicin