VG nunamut asanninneq pillugu erinarsuummik saqqummiussisoq
Nunami maani angalanissamik eqquiniaatitsinermut atatillugu, Katsi Kleist Frederik Elsnerilu Visit Greenlandimik suleqateqarlutik Kalaallit Nunaannut asanninneq pillugu erinarsuummik saqqummiussipput.
Visit Greenland nunami takornariartitsisartut coronap ajornartorsiutaaneranit sakkortuumik eqqugaasimasut aallarteqqinnissaat anguniarlugu, najoqqutassanik nutaanik nassaarniarluni sulissuteqarpoq. Visit Greenlandimit Kalaallit Nunaanni innuttaasut kaammattorneqarput, Katsi Kleistip Frederik Elsnerillu taalliaat ‘Nunarput Nuan’ tunuliaqutatut nipilersuutiliullugu, nunaminni nuannarisartik pillugu naatsunik videolioqqullugit.
Visit Greenlandip nittartakkamigut NunarputNuan.gl sapaatip akunnerata siuliani saqqummiuppaa, taanna aqqutigalugu kalaallit namminneq nunaminni sulinngiffeqarnissamut takornariarnissamullu kajumissaarniarneqarput.
Visit Greenlandip tassunga atatillugu Katsi Kleist Frederik Elsnerilu suleqatigalugit, pineqartut taakku Kalaallit Nunaannut asanninnerminnik taalliaat: ‘Nunarput Nuan’ saqqummiuppaa.
Visit Greenland pingasunngormat juunip pingajuani unamminermik allartitsivoq, tassani innuttaasut nunaminni sunik asanninnerminnik takutitsisumik videolioqqullugit kaammattorneqarput. Assersuutigalugu isikkivik nuannarisaq, iloqqarfik nunaqarfilluunniit angerlarsimaffigisaq videoliarineqarsinnaapput. Innuttaasut kaammattorneqarput nuannarisaminnik videolioqqullugit, erinarsuullu Nunarput Nuan tunuatungaani nipilersuutitut atoqquneqarluni.
Unammisitsinerli filmiollaqqissusermit aalajangiiffigineqassanngilaq, akerlianik makitsinikkut aalajangiisoqassaaq. Eqqugassaapput nunami manni angalanissamut bilitsit gavekortillu.