Venture: Suliassarpassuaqarpoq

Mittarfiliortiternerit suliaqartuni assigiinngitsuni malugineqarsinnaapput, tamannalu atorluarneqartariaqarpoq. Ineriartornerullu oqimaaqatigiinnissaa eqqumaffigineqartariaqarpoq. Greenland Venturemi pisortaq, Karsten Høy, taama isumaqarpoq.

Mittarfiit tallilerneqarnissaat pillugit oqallittoqaliinnartoq, aallarnisaasut akornanni piareersartoqalertoq, Greenland Venturep maluginiarsimavaa. Mittarfissat sutigut tamatigut periarfissanik unammillernartunillu malitseqassapput.

- Takornariaqarnerup iluani aningaasanik isaatitsinerulissaguttam taava unnuiffissat misigisassallu amerlisariaqarpagut. Periarfissanik amerlasuunik pilersitsisariaqarpugut. Pioreersummi kisiisa atussagutsigit inissaqartitsinngilagut. Assersuutigalugu Ilulissani aasaanerani unnuiffissat ulikkaavittarput, Greenland Venturemi pisortaq, Karsten Høy, oqarpoq.

Greenland Venture Namminersorlutik Oqartussanit pigineqarpoq, suliffeqarfinnillu ingerlaqqinniartunik niuerpalaartumik aningaasaliisarluni.

Suliniut angisooq tulleq

Greenland Venturep takornariaqarnermi suliniutinik malinnaavoq, aallarnisaasullu suliniuteqartullu, siunissami neqerooruteqarnissanik soqutigineqartunik niueruteqalernissaannik malinnaalluni.

- Suliassat assigiinngitsut soqutigaagut, maannakkullu mittarfiit suliffeqarfiillu ineriartornissaat malinnaavigilluarlutigit. Suliffeqarfiit aningaasaliisussanik amigaateqarput, niuernermilu ingerlalluarnissaat takusinnaagaagatsigu uagut aaqqiissutissanik peqarpugut, Karsten Høy oqarpoq.

Ilulissani akunnittarfinnik suliaqartoqartoq, taanna oqaluttuarpoq, ilaatigut inuussutissarsiornermik suliaqartut, Tommy aamma Frank Bagger peqataaffigisaannik.

- Akunnittarfiit suliaapput annertuut aningaasaliiffigineqarluarnissaallu pisariaqarpoq. Tassani danskit Aningaasaateqarfiat suleqatigissinnaassallugu neriuutigaarput, taamaasilluta aningaasaliinerit naligi naapertuunnerussammata, Karsten Høy oqarpoq.

Danskit Aningaasaateqarfiat, Vækstfonden, 2019-imi katillugit 200 milliuunit koruuninik aningaasaliinissaa naatsorsuutigineqarpoq, aningaasaliissutit Greenland Venture suleqatigalugu Kalaallit Nunaanni suliffeqarfinnut minnernut agguaanneqassallutik.

Oqimaaqatigiissaarineq pisariaqarpoq

Kalaallit Nunaanni ilaatigut sulisussaaleqisoqartarpoq mittarfiillu tallineqalerpata sulisussat amerlanerit pisariaqartinneqalissapput. Aningaasaliisutut inissisimagaanni pingaaruteqarpoq suliap ingerlatiinnarneqarnissaa, suliarli ataasiinnaq ukkanneqalissappat aningaasaqarnerup qaffapiloornissaa eqqarsaatigineqartariaqarpoq:

- Aningaasaliinissanut aningaasaqarluarpoq. Maaniippugut, aningaaseriviit aamma maaniipput, inuiaqatigiillu maaniipput. Kinali sanasuussava? Suliarerusutagut tamaasa ataatsikkut aallartissinnaanngilagut, Karsten Høy oqarpoq nangillunilu:

- Kissaatigisat suliassallu akornanni oqimaaqatigiissaarinissaq pisariaqarluinnartoq isumaqarpunga. Tamanna peqqinnartuussaaq, aningaasaqarnerlu patajaannerulissaaq. Suliniutit aallartinneqartut siunissami ataavartumik ingerlanneqarnissaat pingaaruteqarpoq, Karsten Høy oqarpoq.

Aningaasaqarnerup qaffapiloorsinnaanera pinngitsoortinniarlugu suliaqartut eqqummaarilluinnartut tatigalugit naggasiilluni oqarpoq.

- Neriuppunga, qularinngilaralu tamanna eqqumaffigineqartoq. Immikkut ilisimasaqartut aningaaseriviillu eqqarsarluarnissamik kaammattuipput. Isumalluarpunga, oqimaaqatigiissaarinissarli eqqaamasariaqarparput, kikkut tamarmik malinnaasinnaaniassammata, Karsten Høy oqarpoq.

Powered by Labrador CMS