Skip to main content

Venstrep nunanut allanut oqaaseqartartua: Ataatsimiititaq Naalagaaffeqatigiinni suleqatigiilluarnerusariaqarpoq

Nunat naalagaaffeqatigiinnermiittut paasissutissanik misilittakkanillu paarlaasseqatigiinneq pikkoriffiginerusariaqaraat, nunanut allanut ataatsimiititap siulittaasua, Michael Aastrup Jensen (V) isumaqarpoq

Siunnersuutigaa, nunanut allanut ataatsimiititaq politikerinik  Savalimmiormiunik kalaallinillu ataatsimeeqateqassasoq  suleqatigiinneq pitsaanerulersinniarlugu.

- Folketingimi ilaasortanik Atlantikup Avannaaneersunik  suleqateqarluarpugut, kisianni Savalimmiuni Kalaallit Nunaannilu politikereqatitsinnik suleqateqarnerput immaqa pitsaanerpaajunngilaq, Michael Aastrup Jensen oqarpoq.

Taanna naalagaaffeqatigiinneq pillugu Odensemi Nordatlantisk Husimi sisamanngornermi januaarip 15-iani Karsten Høgen (SF) aamma Aaja Chemnitz Larsen (IA) peqatigalugit oqallinnermut peqataavoq.

Michael Aastrup Jensen tassani oqaatigaa, nunanut allanut ataatsimiititap, Det Udenrigspoliske Nævnip, siulittaasuanut Martin Lidegaardimut (R) siunnersuutigisimagini ataatsimiititaq Savalimmiuni Kalaallit Nunaannilu politikerinik ataatsimiititami ataatsimeeqatigiinnernut aggersaasassasoq.

- Taamaaliortoqassaaq tamatta piareersarluarnerujumalluta, kisianni aamma Ruslandip, Kinap USA-llu kunngeqarfitta ilaani annertuumik iliuuseqarnerannut atatillugu  siunersioqatigiittoqartarsinnaaqqullugu. Pimoorunneqartariaqarpugut. Taamaammat tamatta oqaloqatigiittarnissarput atorluarsinnaavoq, Michael Aastrup Jensen Savalimmiuni nutaarsiassaqartitsivimmut, Det Færøske Nyhedsbureaumut, oqarpoq.

Qaninnerusumik oqaloqatigiinneq

Venstrep nunanut allanut tunngasuni oqaaseqartartua isumaqarpoq, Danmarkip, Savalimmiut Kalaallit Nunaatalu akornanni nunanut allanut tunngasuni oqaloqatigiinneq qaninnerusariaqartoq.

Donald Trumpip Kalaallit Nunaannik pisiariumannikkumanerata Danmarkimi  politikerit eqeersarneqaatigisimavaa, tamannalu  malitseqartinneqartariaqarpoq kunngeqarfillu pissaanilinnut appakaanniarsarisunut isumannaarlugu.

- Politikkikkut pissusiviusut nutaat kingunerisaannik tamattaalluta kunngeqarfimmi naqqiissuteqartariaqarpugut,  Michael Aastrup Jensen oqarpoq.

Politikerit ilaatigooriarlutik nunat naligiinnerulersinniarlugit  naalagaaffeqatigiinnermi allannguisoqarnissaanut periarfissanik saqqummiussisarput. Michael Aastrup Jensen isumaqarpoq naalagaaffeqatigiinneq nunanut allanut tunngasuni ingerlalluarnerulersinniarlugu namminersorneq pillugu inatsimmi imaluunniit namminersorneruneq pillugu inatsimmi allannguisoqarnissaa pisariaqanngitsoq.

- Inatsisitigut sinaakkutissanik, qaninnerusumik nukittunerusumillu suleqatigiinnermik suliaqalernissamut tunngasunik, atorluaaginnassaagut.

Periarfissamik ammaassisoq

Nunanut allanut ataatsimiititap siulittaasuata, Martin Lidegaardip (R), Michael Aastrup Jensenip siunnersuutaa ilassilluarpaa.

- Kalaallinik Savalimmiormiunillu politikerinik nukittunerusumik oqaloqatiginnittalernissaq ammaffigilluinnarpara, ilaatigooriarluni oqaloqatigiittarnerit aaqqissuussaanerusumillu oqaloqatigiittarnerit eqqarsaatigalugit. Taamaattorli nunanut allanut ataatsimiititami inissaviit Folketingimi ilaasortanut suli tunngatinneqassapput, tunngaviusumik inatsisit naapertorlugit, Martin Lidegaard oqarpoq.

Naalagaaffeqatigiinneq 2.0
 

Karsten Høngep Savalimmiut Kalaallit Nunaatalu ullumikkornit annertunerujussuarmik peqataatinneqartariaqarnerat isumaqatigaa. Karsten Høngep naalagaaffeqatigiinneq 2.0-mut piffissanngorsimanera arlaleriarluni oqaatigaa.

Tamanna tunngaviusumik inatsisit allanngortinneqarnissaannik kinguneqarnavianngilaq. Tamatumani pineqarpoq, nunat peqatigiilluarnerunissaat aaqqissuusseqqinnissaallu. Pingaartumik nunanut allanut politikkimik suliaqartoqartillugu, tamannalu Københavnimit taammaallaat aallaaveqartassanngilaq.

- Assersuutigalugu nunanut allanut politikkimut  tunngasunik matussusiivigineqartussanik suliaqartoqartillugu, isumaliutini aalajangiinernilu siusinnerujussuakkut  pitsaanerujussuarmik akuutitsisoqartassaaq, taamaalillutik Savalimmiormiut kalaallillu pissutsit Atlantikup Avannaanut tunngasunik eqqartorneqarfigisaanni tamani  peqataatinneqartarsinnaaqqullugit, Karsten Hønge oqarpoq.

Kalaallit Nunaanni sakkutooqarneruneq

Savalimmiut Kalaallit Nunaatalu nunanut allanut politikkimi peqataatinneqarnerulernissaannut Issittumi ingerlatsisoqarnerulersimanera pissutaavoq. Taamaattumik Torshavnimi Nuummilu Naalakkersuisut peqataatinneqarnerulernissaa iluaqutaasinnaavoq.

Michael Aastrup Jensenip kissaatigaa Kalaallit Nunaanni sakkutooqarnerulissasoq. Taanna naapertorlugu pingaartumik Tunumi tamaani kikkut nunakkut immakkullu angallannerannik malinnaaviginnittoqarsinnaannginnera ajornartorsiutaavoq.

Namminersortuuneq qulakkeerniarlugu sakkutuut Danmarkimeersut najuunnissaat aamma pingaaruteqarpoq.

- Ruslandip sumiiffimmi tamaani suliaqarneranik ilimagisat nalunaarutigineqartartullu ima amerlatigipput, illuatungiliisoqartariaqarluta. Sakkutooqarnikkut ingasattumik annertusaasoqarnissaa kissaatiginngilara, kisianni kunngeqarfik tamakkerlugu illersortariaqarparput. Maannakkorpiaq  amigaateqarpugut, Tunumilu amigaateqarpugut. Ullumikkut atuuttunut atatillugu milliardilinnik aningaasaliisoqarnissaa pisariaqarpoq, Michael Aastrup Jensen erseqqissaavoq. 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER