Vectrus Permagreenilu suleqatigiilerput isumaqatigiissutissamullu neqerooruteqarsimallutik

Ingerlatseqatigiiffik sanaartugassanik suliaqartartoq Permagreen Grønland A/S aamma Vectrus Services Greenland Aps suleqatigiiffimmik nutaamik, Inuksuk A/S, pilersitsisimapput.

Vectrus Services Greenland Amerikamiut suliffeqarfissuata Vectrusip ilagaa, suliffeqarfissuaq ullumikkut assortuussutaasimaqisumi Pituffimmi kiffartuussinissamik isumaqatigiissuteqarpoq.

Permagreen Grønland ingerlatseqatigiiffimmi nutaami Inuksuk-mi, Pituffiup siunissami ingerlanneqarnissaanut kiffartuussinissamik isumaqatigiissummut februaarip qaammataani neqerooruteqarsimasoq aktianik annerpaamik piginnittuuvoq:

- Suliassat taamatuttaaq ilinniartitaaneq Kalaallit Nunaata suli aningaasaqarnikkut ineriartornissaanik qulakkeerinninnissamut pingaaruteqarput.

Ukiuni aggersuni ingerlatsinissaq pineqartoq

- Thulebasemik aserfallatsaaliuinermut isumaqatigiissummi suliassat ingerlanneqartussat iluanni suleqatigiinneq pitsanngorsarneqarsinnaavoq aamma minnerunngitsumik sanaartornermut tunngatillugu Permagreen Grønlandip issittumik pissutsinik aamma taamatuttaaq kalaallini inuiaqatigiinni misilittagai annertuut eqqarsaatigalugit, Permagreen Grønland tusagassiorfitsigut nalunaaruteqarluni allappoq.

Pituffimmut atatillugu isumaqatigiissutissamik qinnuteqarnissamut februaarip qaammataa killissarititaavoq. Ingerlatseqatigiiffik isumaqatigiissuteqarfigineqartoq, isumaqatigiissummik 2034 tikillugu sivitsuinissamut periarfissaqarpoq.

Pituffiup ingerlanneqarneranut neqeroorut ukiuni aggersuni atuutissaaq. Vectrus Services ullumikkut isumaqatigiissummik piginnittuuvoq, ingerlatseqatigiiffillu USA-mi suliffeqarfissuarmit Vectrusimit pigineqarpoq, taanna Amerikamiut nunarsuarmi tamarmi sakkutooqarfiinik ingerlatsisuuvoq.

Neqeroortitsisarneq assortuussutaasimasoq

Kingullermik neqeroortitsisoqarpoq 2013-imi, tamannalu Kalaallit Nunaata, Danmarkip USA-llu akornanni attaveqatigiittarnikkut ukiuni arlaqartuni ajornatorsiortitsisimavoq, Vectrus Amerikamiunit pigineqartoq isumaqatigiissuteqarfigineqarmat. Kalaallit Nunaannit Vectrusip isumaqatigiissuteqarfigineqarnera akerlerineqarsimavoq, Amerikamiut nunami maani sakkutooqarfeqarneranni Namminersorlutik Oqartussat aningaasatigut iluanaaruteqartarnerannut ajoqusiisimammat.

Ukiuni arlaqartuni isumaqatiginninniartoqareersoq 2020-mi Kalaallit Nunaat USA-lu isumaqatigiissuteqarput, tassani isumaqatigiissutissat danskit-kalaallit ingerlatseqatigiiffiutaannut tunniunneqarnissaa qulakkeerneqarluni. Aamma inatsit nutaaq aqqutigalugu, Pituffimmit akileraarutitigut Kalaallit Nunaata isertitaqarnerulernissaa qulakkeerneqarluni.

Permagreen Vectrusimik siusinnerusukkut politikkikkut akerlerineqarsimasumik suleqateqaleraluartoq, Permagreen Grønlandimi pisortaaneq Jeppe Bloch Steffensen isumaqarpoq, ingerlatseqatigiiffik nutaaq Inuksuk neqeroortitsinermi ajugaanissamut periarfissaqarluartoq:

Per Aarsleff neqerooruteqartunut ilaaqqittoq

- Vectrus sakkutooqarfimmik ingerlatsinermik misilittagaqarpoq, ingerlatseqatigiiffiutittalu marluusut ataatsimoortinnerisigut iluaqutaasinnaasunik pilersitsisinnaassaagut.

- Piffissaq ungasinnerusoq eqqarsaatigalugu siunertaavoq, ingerlatsinerup uagutsinnit tigummiinnarneqarnissaa, Jeppe Bloch Steffensen Sermitsiaq.AG-mut oqarpoq.

Danskit ingerlatseqatigiiffiutaat sanaartugassanik suliaqartartoq Per Aarsleff A/S Permagreen Grønlandip aktiaataanik annerpaamik piginnittuuvoq. Per Aarsleff 2013-imi kiffartuussinissamik isumaqatigiissutissap neqeroorutigineqarneranut qinnuteqartut ilagisimavaat, kingusinnerusukkullu Amerikamiut eqqartuussiviisigut suliamik ingerlatsisimagaluarluni.

Per Aarsleffip piginneqatigiiffiit allat marluk peqatigalugit, kiffartuussinissamik isumaqatigiissutip Vectrusimit pigineqartumut Exelis Servicesimut tunniunneqarnissaanik aalajangersimaneq allanngortinniarsimagaluarpaa.

Suliaq unitsinneqarsimavoq, maannalu Per Aarsleff Permagreenimik piginnittuunini aqqutigalugu Amerikamiut ingerlatseqatigiiffiutaanik suleqateqalersimalluni.