UV atorlugu amerluutinik katsorsaanermut aningaasaliissutit amerlanerit aningaasanut inatsimmi isumaqatigiinniutigineqassapput
Naalakkersuisut Nuummi amerluutinut katsorsaariaaseq nutaaq sunniuteqarluartorlu nuannaarutigaat, nakorsarlu immikkut ilisimasalik taperserlugu: Innuttaasut sumiiffinni allani katsorsarneqarsinnaasariaqarput, nunalli immikkoortuani nakorsaq eqqissiimeqqusivoq.
Naqqinneqartoq 12.30 Allaaserisami siusinnerusukkut atuarneqarsinnaavoq Naalakkersuisunit akissut Mimi Karlsenimeersuusoq. Naalakkersuisut tamatuma kingorna ilisimatitsipput, akissut Mimi Karlsen angalasoq taamaammallu akissuteqarsinnaanngitsoq sinnerlugu Jess Svanemeersuusoq.
Nuummi nakorsiartarfimmi UV atorlugu amerluutinik katsorsaaneq nutaajukanneraluartoq, katsorsaariaaseq innuttaasunit amerluutilinnit iluaqutigineqarlualereerpoq.
Sermitsiaq.AG-mi anaanap paniatalu inuunerminnik pitsanngoriartitseqqissimanerat allaaserineqareerpoq.
Jess Svane Peqqissutsimut Naalakkersuisoq Mimi Karlsen sinnerlugu paasissutissiivoq, neqeroorutip innuttaasunut amerluutilinnut annertusineqarsinnaasimanera naammagisimaartorujussuugini.
Utaqqisut allattorsimaffiat talliartorpoq. Allatut oqaatigalugu katsorsaariaaseq ullumikkut taamaallaat illoqarfiit pingaarnersaanni neqeroorutigineqarsinnaasoq piumaneqartorujussuuvoq. Nakorsaq immikkut ilisimasalik amerluutinullu tunngasuni akisussaasoq Lone Hove neriuppoq, neqeroorut sinerissamut siammarneqassasoq.
Eqqissiimeqqusisoq
Tamanna Jess Svanep isumaqatigaa. Taamatuttaaq isumaqarpoq, neqeroorut nunatsimmi sumiiffinni allani neqeroorutigineqarsinnaariaqartoq, innuttaasunit amerluutilinnit amerlanerusunit iluaqutigineqarsinnaaqqullugu.
Jesper Olesen, Dronning Ingridip Peqqissaaviani nunap immikkoortuani nakorsaaneq, nassuiaalluni oqarpoq, UV atorlugu amerluutinik katsorsaaneq tassaasoq paasisaqarfiginerujumallugu region Sermersuumi napparsimasut katsorsarnissaannut aningaasaliissutaasimasut ilaannik pingaarnersiuilluni atuinikkut salliutinniarlugu toqqarneqarsimasoq.
- Maannamut ingerlalluartutut isikkoqarpoq, kisianni uagutsinnut pimoorullugu iluatsissinnaalernissaanut suut pisariaqarnissaannik misileraaneq suli naammassinngilarput:
- Arlalissuarnik paasisaqarniarsarivugut.
Tamakkiisumik isiginninneq isumatusaartoq
Taamaattumik tusagassiuutip matuma Jess Svanemut Mimi Karlsen sinnerlugu apeqqutigisimavaa, pineqartumut aningaasaliinissaq eqqarsaatigisimaneraa. Tassungalu ima akivoq:
- Pineqartup aningaasaliiffiginissaanut kissaatit aningaasanut inatsisissami pingaarnersiuinermut tamarmiusumut partiit akornanni isumaqatigiinniutigineqartussamut ingerlateqqinneqarnissaat pilersaarutaavoq.
Jesper Olesen paasissutissiivoq, katsorsaanermut atatillugu pingaartumik unammilligassat suusinnanerannik peqqinnissaqarfik tamakkiisumik isiginninnermik isumatusaartumik pigisaqaleqqaartariaqartoq.
Peqqinnissamut aqutsisoqarfimmi 2023-mi qanoq ingerlasoqarsimaneranik naammaginartumik nalilersuisinnaasut naatsorsuutigaa.