Uummatigissoq: Angerlarsimaffeqanngitsut nuannaraagut

Københavnimi angerlarsimaffeqanngitsunut Morgencafé aqqusinermi inuunermit artornartumit eqqissisimaarfissamik neqerooruteqartarpoq. Neqeroorut taanna kalaalerpassuit nuannaraat.

Michael Espensen (talerperleq) Morgencafémi kajumissutsimik suliaqartut ilaat peqatigalugu

Inuit atugarliortut pillugit kusanartumik oqaatsinik tusarumagaanni, taava Michael Espensen saaffissaanngilaq, taanna Morgencafémik Københavnimi Nordvest-kvarterimiittumi aqutsisuullunilu pilersitsisuuvoq. CD-mik saqqummersitsissagaluaruni 'Eksplicit language'-mik nalunaaqutserneqassagaluarpoq.

Kisianni tunuarsimaarani Københavmiorpaluttumik oqaaseqarnerata tunuani Københavnimi angerlarsimaffeqanngitsunut uummateqartuuvoq – ukiunilu 30-ni kingullerni taamaasimavoq.

- Inuttut nuannarigatsigit ikiuerusuppugut, taanna apersorneqarnermini arlaleriarluni taama oqarpoq.

Kalak

’Taakku’ tassaapput inuit angerlarsimaffeqanngitsut 80 aamma 200-t akornanniittut, ullut tamaasa Morgencafémut pilersissimasaanut neriartortartut. Taakku 70 procentiisa missaat kalaalliusut, Michael Espensenip missingiutigaa.

- Kalak qanoq isumaqarnersoq nalunngiliuk, taanna aperivoq.

- Tassami arlallit taama taasarpaannga.

Michael Espersenip Morgencafémik pilersitsineranut tunuliaqutaasoq paasiniarutsigu, 1980-ikkut utissaagut, taanna tassaavoq unnuap ilungersunartup kingorna neriartorfigineqarsinnaasoq.

- Blågårdpladsimi (Københavnimi Nørrebromi, aaqq.) inuppassuit inuunerissaanngitsorpassuit uninnganeranni isumassarsiaq pinngorpoq. Imigassartorsimaqalutik siunissaqanngitsut. Tassanilu eqqarsarpugut: iliuuseqarfigisinnaanerlugit takoriartigu. Taamaalillutik ullaakkorsiorfigisinnaasaannik ulloqeqqasiorfigisinnaasaannillu sumiiffissaqarniassammata.

- Aamma tassanngaanniit nikisissinnaanerlugit takussagatsigu.

- Illoqarfimmi ornittakkani pitsaanerpaaq

Morgencafé Blågårdspladsimi nuuppoq, ukiorpaalunnilu Københavnimi oqaluffinnut arlalinniittarpoq. 2013-imili nammineq Nordvest-kvarterimi illutaqalerpoq.

- Iluatsinnerpaasarput tassaagunarpoq, angerlarsimaffeqanngitsut maanngarlutik illoqarfimmi ornittakkani pitsaanerpaatut oqaatigisarmassuk.

Kalaalerpassuit sumiiffimmut orniguttartut nereqatigiittarfimmik pilersitsisimapput, Kalaallit Illuutaannik taallugu, aamma kingullermik nuersaaqatigiittartunik pilersitsisoqarsimalluni.

Tamatuma saniatigut neqerooruteqarpoq, tassani Morgencafé atisanik sinngup puuinillu agguaasarpoq, kiisalu nakorsiarnermut, pillorissarnermut, isikkakkut terapimik, nujaajaanermik aamma inatsisitigut siunnersuinermik neqerooruteqarluni. Tamatuma saniatigut Morgencafé juullikkunni aaqqissuisarpoq aamma bankortitsisarluni kiisalu pinngortitami angalaartitsisarluni.

Inuit nikisittaraat

Kajumissutsimik suliaqartut sulinerup annerpaartaa ingerlappaat. Café ikitsuinnarnik sulisoqarpoq.

Aqqusinermi inuunermit ilungersunartumit anersaarfissamik neqerooruteqarnermit annertunerusumik anguniagaqarput. Inuit nikeriarnissaannut tunngalluinnarpoq – annikitsumik imaluunniit annertuumik.

- Maanga aggeraangata sumiginnarneqarsimanerarlugit, taamaammallu taamatut inissisimalersimanerannik oqarfigisarpagut. Inuiaqatigiinni nammineersinnaaguit, taava maaniissimassanngikkaluarputit, Michael Espensen oqarpoq.

Kalaallinut arnanut suliniut

Morgencafép suliniut immikkut ittoq, kalaallinut arnanut sammitinneqartoq pilersippaa. Taakku atornerluinermi, atornerlugaanermit aamma angerlarsimaffeqannginnermit ikiorneqartarput.

- Eqimattani arnat ajornermik atugaqartarunarput, taanna oqarpoq.

- Arnaalluni aqqusinermi najugaqarneq ulorianartorujussuuvoq, siniffimmillu arlaanni atugaqassagaanni akeqartarpoq, Løkke Munk Kierkegaard, suliniummi akisussaasoq taama oqarpoq.

Suliniummi ukiup affaani ingerlatsisoqartarpoq, arnat 30-t missaanniittut suliniutip ukiuni marlunni ingerlanneqarnerani peqataareerput. Ataaseq eqqaassanngikkaanni, tamarmik atugarinnerulernikuupput, Løkke Munk Kierkegaard oqaluttuarpoq.

Kalaallit arnat pillugit suliniutip ingerlateqqinnissaanut maanna aningaasassaqartoqanngilaq.

Powered by Labrador CMS