Uummannaq: Tankinik imiisivillit akuerineqarput
Uummannami imiisiviit kingulliit qulit maanna imermut imerneqarsinnaasumut atorneqarnissaat akuersissutigineqartoq, Nukissiorfiit ilisimatitsipput
Uummannami tankinik imiisivillit maanna imertornissamut ernumassutaarupput. Tassami tankinit imeq imerneqarsinnaalerpoq.
Nukissiorfiit nittartakkaminni allapput.
- Pinngortitamut Avatangiisinullu Naalakkersuisoqarfik marlunngormat Uummannami imiisiviit kingulliit qulit (allattorneqarnerat ilanngussaq takujuk) imertaannik misissuisimanermut inernerit naammaginartut tigusimavai. Taamaattumik naalakkersuisoqarfiup imiisiviit taakku atorneqarsinnaanerannut killilersuinerat atorunnaarsinneqarpoq. Imeq taakkunannga imiisivinneersoq taamaalilluni imerneqarsinnaaleqqippq, Nukissiorfiit allapput.
Uummannami imermik pajuttuisarnerup nalinginnaasunngorneranik tamanna kinguneqarpoq. Nukissiorfiit suli sulissutigaat maqinneqartunik imeqartunut pilersuinerup nalinginnaasunngortinnissaa.