Uummannaq: Sigguup tunisassiorfissaa aaqqiissaaq
Aqutsiveqarfik Uummannami aalisartut amerligaluttuinnarnerat tunitsivinnut annertuumik sunniuteqarnerluppoq. Uummannamili aalisakkerivik nutaaq atulerpat tamanna qaangerneqarumaartoq qularutigineqanngilaq.
Ukiut kingulliit ingerlaneranni Uummannami eqqaanilu aalisarnerup annertusiartuinnarnera ilutigalugu, aalisakkanik tunisiniarneq ajornartorsiutaaleriartorpoq.
Sigguk A/S-ili maanna Uummannami aalisakkanut suliffissualiortoq, aalisartunut isumallualersitsivoq. Aalisakkeriviliornissaq 13. maj Naalakkersuisut akuerigaat, aviisi Sermitsiaq allappoq.
Uummannami aalisakkerivissaq novemberip naanerani ammarneqarnissaa naatsorsuutigineqartoq, Frans Heilmann, Sigguk A/S-imi piginneqataallunilu pisortaq oqarpoq. Aalisakkat ullormut 30 tonsit missaanniittut tiguneqarsinnaanissaat, ukiorlu kaajallallugu tunisisoqarsinnaanissaa siunertaavoq, aammalu sulisut 30-t tungaanut sulisorineqarsinnaanissaat naatsorsuutigineqarpoq.
Sigguk A/S 1998-imi pilersinneqarpoq, piginneqataasullu amerlanersaat Uummannarmiuupput. Tamannalu tunngavigalugu Uummannami aalisarnikkut suliffissuaqarnikkullu inerisaanissaq siunertaajuarsimasoq, pisortaq oqarpoq.
Sigguk A/S-ilu aqutsiveqarfik Uummannami aalisarnermik inuussutissarsiuteqarnermut annertuumik sunniuteqarnissaa qularutigineqarsinnaanngitsoq, Frans Heilmann oqarpoq.
- Uummannami tuntisiveqarnikkut ajornartorsiuteqartoqarnera ilisimavarput. Taamaattumik aalisakkanik suliffissuaq nutaaq aalisartunut iluaqutaanissaa qularutissaanngilaq, taanna oqarpoq.
Sigguk A/S-ip Uummannap eqqaani umiarsuarmik tunitsiviliinissaa Naalakkersuisunit akuersissutigineqarpoq, umiarsuarlu saarullinnik qaleralinnillu tunitsiviusussaq julimmit aappaagu januarip tungaanut Uummannap eqqaaniinnissaa naatsorsuutigineqarpoq. Sigguk A/S-imi piginneqataassutit affai Polar Seafoodimit pigineqarput.
Sanaartorneq neriuuteqalersitsivoq
Uummannap eqqaani qaleraleqassuseq pitsaasuusoq, aammalu ukiut siuliini taamaattuarsimasoq, Karl Tobiassen, Qaarsuni aalisartut piniartullu peqatigiiffianni siulittaasoq, aamma KNAPK-mi siulittaasup tullia, oqarpoq. Aammali ukiut kingulliit arlaqartut aalisartut tamaanga aalisariartartut amerliartuinnavissimapput.
Pisaasartullu amerliartornerat ilutigalugu Uummannami nunaqarfiinilu aalisakkerivinnut tunisiniarneq ajorsiartuinnarsimavortaaq. Tunisinermi ajornartorsiutit kingunerisaannik maanna angallatit tunisiniartut sapaatip akunneranut ataasiaannarlutik tuniseqqusaanerat naliginnaasuuvoq. Tunisinermilu ajornartorsiutit ukiuni arlaqalersuni ilungersunartorsiortitsisarsimaqimmata, Uummannami nutaamik aalisakkeriviliornissaq aalisartut atugaannut annertuumik iluaqutaajumaartoq, Karl Tobiassen isumaqarpoq.
- Aalisakkanik suliffissuartaassaq isumalluarfigaarput. Taamaattoqarneralu qalerallit akiisa qaffannerannik kinguneqarnissaa neriuutigaarput. Aammali saarulleqarluarmat, maannakkornit amerlanerisut saarullinniartalernissaanut ammaassisuussaaq, taanna oqarpoq.
Aviisimi Sermitsiami atuarnerusinnaavutit: