Uummannaq: Meeqqanut nunaqarfimmiunut qinngasaarneqartartunut akiuniarneq nutaaq

Kalaallit Røde Korsiat Uummannami Edvard Krusep Atuarfia peqatigalugu atuarfimmi qinngasaarinermut pinaveersaartitsinissamut suliniuteqarput.

Edvard Krusep Atuarfiani ilinniartitsisoq upernaaq saaffiginnissuteqarmat suliniut aallartippoq, meeqqat nunaqarfinneernerusut atuarnerminni qinngasaarneqartarnerat maluginiarneqarsimanera tassani peqqutaavoq. Kalaallit Røde Korsiat (KRK) tusagassiuutinut nalunaarummi ilisimatitsivoq.

Aviisip Sermitsiap, Nuugaatsiap tassaarsuaqarneranit eqqugaanerata kingorna, meeqqat Nuugaatsiameersut Uummannamut nuunnikuusut, Edvard Krusep Atuarfiani qinngasaarneqartarsimasut allaaserai.

Atuartitsinermut pilersaarusiorsimasut

- Ajornartorsiut aaqqiiviginiarlugu eqimattamik atuartunut tamanut ukiumi atuarfiusussami ilinniartitsinermut ingerlatsinissamut pilersaarusiortussanik pilersitsisoqarpoq.

Kalaallit Røde Korsiat inuusuttunik maligassiuisuusunik suliniummi piffimmi aggustip 24-ianniit 31-iata tungaanut ingerlasussami peqataarusuttunik nassaarnissaat siunertarineqarsimavoq.

- Taakkunani Kimmernaq Kjeldsen aamma Nathan Kreutzmann Nuummeersut kiisalu John Ludvig Broberg Qeqertarsuarmeersoq qinerneqarsimapput, tamarmillu peqataanissaminnut akuersaarput, Kalaallit Røde Korsiat ilisimatitsivoq.

KRK-p Ikiuinissamut Aningaasaliisarfiata peqataasussat pingasut angalanissaat akilissavaa, akissarsinerillu kommunip isumagissavai.

Tassaarsuarmit eqqugaasunut tapersiineq

Ikiuinissamut Aningaasaliisarfiup decembarimili ilaqutaqutariit ataasiakkaat najukkami pigisanik 56.000 koruunit nalinginut pisiortornissamut taperserpai, KNI-lu peqatigalugu juullimut gavekortinik 171.000 koruunit nalingininut qimagussukkanut tunniussuilluni, kiisalu Uummannami innuttaasunut juullimi aliikkusersuisoqarneranut 31.200 koruunit tunniunneqarlutik.

Tassaarsuaqareernerata ukioq ataaseq ingerlareersimaneranut atatillugu KRK Uummannamiittoq illoqarfimmi innuttaasunut ualikkut aaqqissuussisoqarneranut 20.000 koruuninik tunineqarpoq, tassanilu Nuugaatsiamiit sinniisoq qinnuteqarsimasoq 55.000 koruuninik orsussamut, nerisaqarnermut, ineqarnermut kiisalu ilaqutariit nunaqarfinneersut qimagussugaasimasut Qeqertarsuup Tunuani angalaarunneqarnissaannut atugassanik pissarsitinneqarpoq.

Tamatuma saniatigut atuarfimmi sulisunut, innuttaasunut sullissisunut aammalu peqqinnissaqarfimmi sulisunut eqqarsartaatsikkut ikiueqqaarnissamut pikkorissarnermut ikiuinissamut aningaasaliisarfik aningaasaliisimavoq. Taamatuttaaq sulisartut marluk Uummannameersut maajimi 2018-imi akunnerit 32-t pikkorissareerlutik eqqarsartaatsikkut ikiueqqaarinermut ilitsersuisutut naammassipput.

Powered by Labrador CMS