Uummannaq: Imeq imeqarfimmeersoq imerneqarsinnaaqqilerpoq
Uummannami innuttaasut illoqarfiup imeqarfianit imersinnaanngoqqipput. Imerli kuuffinniit kuuttoq suli imerneqarsinnaanngilaq eqqiluisaarnermiluunniit atorneqassanani.
Uummannami imeqarfik minguitsumik imeqaqqilerpoq, innuttaasullu imermik imeqarfimmeersumik imertarsinnaanngorput. Nukissiorfiit tusagassiutinut taama nalunaaruteqarput.
Uummannami imeq imerneqarsinnaasoq uuliamik mingutsinneqarsimanera tallimanngornermi
septembarip 20-anili paasineqarmat Nukissiorfiit Uummannami innuttaasut imermik avataaneersumik pilersulerpaat. Uummannami sumiiffinni arlalinni tankersuit imermik imaqartut imertarfissanngorlugit inissinneqarsimapput.
Uummannami imermik pilersuineq maanna ajornannginnerulerpoq.
- Nakkutilliisut imeq Uummannami imeqarfimmi nioqqutissiarineqartoq atorneqarsinnaasunngortippaat, taamaalilluni imeq imerneqarsinnaalerluni, Nukissiorfiit tusagassiutinut nalunaaruteqarput.
Imeq kuuffikkoortoq imerneqassanngilaq
Imeq kuuffikkut kuuttoq suli imerneqaqqusaanngilaq, erngup aqqutai suli salinneqarlutik naammassinngimmata.
- Imeqarfiup pilersuisinnaalernera pitsaasuuvoq, tassami illoqarfiup imermik pilersorneqarnerata nalinginnaasunngortinneqarneratigut suliarput ajornannginnerulersippaa. Pingaartoq suliassarput tulliuttoq tassaavoq erngup aqqutaasa salilluarneqarnissaat. Nukissiorfiit erngup aqqutai assigiinngitsut immikkuualuttukkuutaarlugit kuutsitsivigisaqattaarlugit salippaat. Ullut tamaasa illoqarfimmi sumiiffinnit assigiinngitsuneersunik misissukkanit inernernik takkuttoqartarpoq. Imertartarfinnit, illunit, pisortat suliffeqarfiinit aamma suliffeqarfinnit allanit. Paasivarput salillugit imermik kuutsitsivigineqaqattaarnerat iluaqutaasoq, amerligaluttuinnarlunilu sumiiffinni imermi uuliaqarnera malunnarunnaarluni. Kisianni suli suliarput naammassinngilarput, nukissiorfinnik pisortaagallartoq, Claus Andersen-Aagaard ilisimatitsivoq.
Atorneqarnissaanut killilersuutit
Nukissiorfiit ilisimatitsivoq erngup kuuginnartup atorneqarnissaanut killilersuutit suli allanngortinneqanngitsut, tassa maqinneqartartumik imeqartunut aamma tankeqartunut.
Imeq kuuffimmeersoq ukununnga atorsinnaavoq:
- Anartarfiup kuutsinneranut
- Assaat errortornerinut
Imeq kuuffikkut kuuttoq uffarnermut, eqqiaanermut, errorsinermut erruinermulluunniit suli atorneqarsinnaanngikkallarpoq.
Saliinissaq
Nukissiorfiit ilisimatitsivoq innuttaasut imermut tankiutillit tankiinik saliineq aallartereertoq. Aalisakkerivik imermik annertunerusumik ullut tamaasa pilersorneqalernissaa aamma naatsorsuutigineqarpoq.
Imeqarfiup ernga imerneqarsinnaasutut aappassaat maanna nalunaarutigineqarpoq. Erngup atorneqarsinnaanera siullermik nalunaarutigineqarmat, ullorli ataaseq qaangiutiinnartoq erngup atorsinnaanera Nukissiorfinnit taamaatinneqarluni. Kingullermik pilersuititsilerneq ulluni marlunni misissuinerni imermi uuliartaqannginneranik tunngaveqarpoq. Maannali ullut arfineq-marluk erngup uuliamit mingutsinneqannginneranik takussutissaqareerluni, Nukissiorfiup erngup atorsinnaanera nalunaarutigaa.
Uummannaq imermik misissuivimmik nuunneqarsinnaasumik ippassaq pissarsivoq, Nukissiorfiullu erngup pitsaassusaa erngerluni misissorsinnaalerlugu.