Uummannaq: Erngup mingutsinneqarnera naajorartitsisoq
Uummannami ilinniartitsioq Margrethe Løvstrøm imermit mingutsinneqartumit uffareernermi kingorna qanermigut qaniatalu eqqaatigut naatitsivoq timaalu panilerluni. Illoqarfimmi erngup kuuffii tamarmik taarserneqarnissaat anguniarlugu atsiornernik katersititsinissamik pilersaaruteqalerpoq
Uummannami erngup uuliamik akoqalereerneratigut ilinniartitsisup Margrethe Løvstrømip naammagittarsinnaanera killeqalerpoq.
Illoqarfimmi erngup kuuffii tamarmik taarserneqarnissaat anguniarlugu piumasaqaateqartumik atsiornernik katersititsiniarluni aalajangerpoq.
- Erngup kuuffii taarserneqaqqaartinnagit erngup kuuffianit imeqqinngisaannassaanga. Kuuffinni uuliaqareersoq iluarsineqarsinnaanissaa tatigisinnaanngilara. Atsiornernik katersakka Naalakkersuisunut ingerlateqqinniarpakka, Margrethe Løvstrøm Sermitsiaq.AG-mut oqarpoq.
Uffareerluni timaa panilersoq
Pinngortitamut Avatangiisinullu Naalakkersuisoqarfiup Nunatsinni Nakorsaaneq suleqatigalugu aalangertoqarpoq Uummannami imermik atuisinnaanermut killersuineq erngup aqqutaasa ilaannut allanngortinniarlugu imatut, tassa tamaani imeq uffarnermut, atisanik errorsinermut, erruinermut aamma eqqiaanermut atorneqarsinnaalersillugu. Imeq imerneqarsinnaanngitsoq nalunaarutigineqarpoq.
- Uffareerlunga qanerma iluatigut siggunnilu naasoorpunga timeralu panilerluni. Siornatigut naasoornikuunngilanga, erngup mingunnera pissutaalluni taamaasisoqartoq ilimagaara. Uffareerlunga eqqarsaleraluarpunga tappingissanerlunga. Kuuffik aqqutigalugu uffaqqinnianngilanga, aamma paasiuminaatsippara sooq uffartoqarsinnaalerneranik nalunaartoqarsimanersoq, Margrethe Løvstrøm oqarpoq.
Nilattartariaqartartoq
- Qanoq imermik pissarsisarpit?
- Imeq maannga nassiunneqartoq mamarinnginnakku nammineerlunga nilattartarpunga. Allanngortoqanngippat taamaaliortaannassaanga, akivoq.
Politikerit iliuuseqartariaqartut
Uummannami erngup ajornera politikerinit qisuariarfigineqarsimannginnera Margrethe Løvstrømip paasiuminaatsippaa.
- Innuttaaqataavugut, ikiortariaqarpugut. Poltikkerinit iliuuseqarfigineqanngilaq, sumiginnagaasutut misigisimavugut. Naalakkersuisut siulittaasuat Kim Kielsen qisuariaateqarnikuunngilarluunniit, tamanna ajorpallaaqaaq, Margrethe Løvstrøm oqarpoq.