Skip to main content

Uummannaq nutaamik tunitsvittaalersoq

Naalakkersuisut tunitsivittaarnissamik qinnuteqaammik akuersipput, peqatigitillugulu ingerlatseqatigiiffik Sigguk A/S avoqqaaralugu

Naalakkersuisut maajip 13-iani ataatsimiinnerminni aalajangerput, Sigguk A/S-ip Uummannami tunitsivimmik aalisakkerivimmillu pilersitsinissamut qinnuteqaataa akuerinniarlugu. Aalajangerneq ukioq manna januaarip qaammataani aalajangiinermut akerliusoq. Taamanikkummi ingerlatseqatigiiffik qinnuteqaamminut itigartinneqarpoq, illoqarfimmi marlunnik aalisakkeriveqareernera tunngavilersuutaalluni.

Sigguk A/S-imi pisortaq Frans Viggo Heilmann isumaqarpoq, tunngavilersuutit nutaat Naalakkersuisut isumaannik allanngortitsisimasut.

-Nalunngilarput saarullippassuit Uummannamukaanneqarneq ajortut, ukiukkut toqqorsivissamik amigaateqartoqarnera pissutigalu. Qalerallit salliutinneqaramik, taanna Sermitsiaq.AG-mut oqarpoq.

Tamatuma saniatigut aasakkut tunisassiornissamut inissamik amigaateqartoqarpoq, pisortaq nassuiaavoq.

- Qaleralinnut inissat amigarput, taamaammat saarullinnik, saniatigut pisarisuukkatut tunisassiaalluartaraluartut, pisiaqarnaveersaartoqartarpoq.

Kammalaatersortoqarneraasimasoq?

Naalakkersuisut ataatsimiinnermit imaqarniliaanni aamma allassimasoqarpoq: Suliffeqarfimmuttaaq nalunaarutigineqassaaq, kammalaatersortoqarsimaneranik passilliuteqarnerit Naalakkersuisunit akuersaarneqanngimmata. Peqatigitillugu ingerlatseqatigiiffimmut erseqqissaatigineqassaaq, pisassiissutit qaffanneqarnissaannik naatsorsuuteqartoqassanngitsoq.

Imaqarniliamili taamatut allassimasoqarnera Aalisarnermut, Piniarnermut Nunalerinermullu Naalakkersuisoqarfimmi pisortap Jørgen Isak Olsenip imaluunniit Siggummi pisortap oqaaseqarfigerusunngilaat.

- Isumaqarpunga paatsoortoqarsimasoq. Naalakkersuisut qanoq isumaqarnersut aperisariaqarpatit, Frans Viggo Heilmann oqarpoq.

-Immikkoortup taassumarpiaap sooq ilanngukkusunneqarsimaneranut suna tunngaviunersoq naluara, Naalakkersuisoqarfimmi pisortaq mailikkut Sermitsiaq.AG-mut allappoq.

Pisassiissutit qaffanneqarnissaannut tunngatillugu Siggummi pisortaq suli ernumalinngilaq. 

-Soorunam pisassiissutit amerlanerusut pisariaqartippavut, maannakkorpiarli corona pissutigalugu tamanna nukiginnanngilaq, Frans Viggo Heilmann oqarpoq.

Aalisakkerivissaq nutaaq sanaartorlugu aallartinneaqareerpoq, pisortallu neriuutigaa deceberip qaammataata naanerani naammassillugu suliarineqareersimanissaa.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER