Skip to main content

Uummannap eqqaanit inuit qimarrapput

Qaasuitsup Kommunia inunnut umiatsiaaqqanik aallarlutik qimaasimasunut nalunaarsuivinnik illoqarfinni sisamani aaqqiivoq

Uummannap eqqaani innuttaasut ilarpassui toqqissisimanngillat.

Ilaallu toqqissisimanngingaaramik nammineerlutik umiatsiaaqqaminnik sumiiffimmit qimarngupput.

Taakkuupput inuit nunaqarfinnit qimagussortitsiffiunngitsuneersut, kiisalu ilaat Uummannameersut. Qaasuitsup Kommuniani isumaginnittoqarfimmi pisortaq, Henrik Sóloy ilisimatitsivoq.

- Ilulissani, Qasigiannguani, Qeqertarsuarmi aamma Aasianni tikittunut nalunaarsuisarfinnik aaqqissuussaqarpugut, taamaalilluta sumiiffimmik qimatsisimasunik tikilluaqqusiniassagatta, Henrik Sóloy, Sermitsiaq.AG-mut taama oqarpoq.

Tikittut tamarmik atii najugaallu nalunaarsorneqarput. Tamanna tunuliaqutigalugu maannamut inuit 20-t missaanniittut sumiiffimmit aallarsimasut, Henrik Sóloy ilisimatitsivoq.

- Arlaqartut ilaqutariiupput meerartallit, taanna oqarpoq.

Qaqqap ilaata sisoorsinnaasup tassaarsuaqartitsisinnaasullu inuit toqqissisimanngitsippai. Politiit naliliineq naapertorlugu nunaqarfiit taakku sisamat qimagussortitsiffiusariaqanngitsut aalajangernikuupput.

Naalakkersuisut siulittaasuata, Kim Kielsenip aamma naalakkersuisoq Erik Jensenip (S) politiinit aallartitat peqatigalugit sumiiffimmi angalaarlutik toqqissimatitsiniarsarigaluarput.

Taamaakkaluartoq ilaat kujammukaapput.

- Tikippata ikiornissaannut piareersimavugut, Henrik Sóloy oqarpoq.

- Imermik, atisanik, nerisassanik pissapput, najugaqarfigisinnaasaannik aamma qulakkeerinninnikuuvugut.

- Pisariaqartinneqarpat aamma nakorsamit ikiuisoqarnissaanut neqerooruteqarpugut.

Tarnimikkut ikorfartorneqarnissamik pisariaqartitsisunut kommuni aamma ajornartoornermi upalungaarsimasunik piareersimatitsivoq.

Uummannap Sulluanit umiatsiaaqqamik Qeqertarsuup Tunuanukartut tamaasa, sillimaniarneq pissutigalugu isumaginnittoqarfimmi pigaartumut sianereertaqqullugit.

Oqarasuaatinut ukununnga ataanut allassimasunut tamanna pisinnaavoq:

  • Ilulissat: 53 09 17
  • Aasiaat: 53 61 32
  • Qasigiannguit: 52 31 02
  • Qeqertarsuaq: 54 13 94

Tassunga atatillugu uku paasissutissiissutigineqassapput:

  • Ateq aamma ukiut
  • Suminngaanneerneq
  • Sumut killinnerluni
  • Umiatsiami qassit ilaanersut
  • Illoqarfimmut ornitamut qaqugu tikinnissaq naatsorsuutiginerlugu
Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER