Uummannap aqutsiveqarfiani angallatersorluni qaleralinniarneq ajalusoortoq

Aqutsiveqarfik Uummannami aalisartut amerlavallaalernerat pissutaalluni angallatinut qaleralittassiissutit nungupput, tamannalu annertuumik eqquinerluttoq, angallataatillit isumaqarput.

Aqutsiveqarfiit Upernavik, Uummannaq Qeqertarsuullu Tunua ataatsimut nunap immikkoortuani 47-miipput, sumiiffinnilu taakkunani sinerissap qanittuani qaleralinniarnermi pissutsit ernumanartumik inississimanerat pissutingalugu aaqqissuusseqqittoqarnissaa pisariaqartoq, oktoberip naalernerani naalakkersuisut oqaatigaat.

Aviisi Sermitsiaq taama allappoq.

Naalakkersuisullu naapertorlugit umiatsiaaqqanut angallatinullu qaleralittassanik pisasseeriaatsip maannakkut iluseqartillugu atuutsinneqarnera unammilligassat annerit ilagaat. Inatsillu maanna tunngavigineqartoq angallatinut umiatsiaaqqanullu pisassiinermi agguuaassisoqarnissaanik piumasaqaatitaqarpoq.

Umiatsiaararsorluni qaleralinniarnermi qaammammoortumik pisassat nungummata oktoberi qiteqquttoq aqutsiveqarfik Upernavimmi umitsiaararsorluni qaleralinniarneq matuneqarpoq. Umiatsiaararsorlunili qaleralinniarnerup ingerlaannarsinnaanissaa qulakkeerniarlugu tamatuma kinguninngua Naalakkersuisut aqutsiveqarfik Upernavimmut 900 tonsinik pisasseeqqipput.

Aqutsiveqarfik Uummannamilu angallatinut qaleralittassiissutit ukiumoortut nungunneqarmata novemberip arfineq pingajuanni angallatersorluni qaleralinniarneq aqutsiveqarfik Uummannami aamma matuneqarpoq.

Eqquinerluttoq

Aalisartoq piniartorlu angallataatilik Karl Markussen, Uummannami eqqaanilu 6 meterimik anginerusumik angallataatillit peqatigiiffianni, Qaleralinniat Peqatigiiffiat, QP-mi siulittaasuuvoq. Taassuma angallataa niuverutigineqarsinnaasunik 88 tonsinik qaleralinnut suli pisassaateqarpoq, taakkulu maanna aqutsiveqarfik Uummannami aalisarsinnaajunnaarpai.

– Angallatersorluni qaleralinniarnerup matuneqarnera akuersaarneqarsinnaangilluinnarpoq. Ukiut kingulliit ingerlaneranni aalisartorpassuit sumiiffinniit allaniit Uummannap eqqaanut aalisariartarput tamaanilu pisassiissutaasunik aalisaqataasarlutik.

Aviisimi Sermitsiami atuarnerusinnaavutit. Aviisi uani pissarsiariuk:

Powered by Labrador CMS