Uummannami tunillatsissimasoq peqqinnissaqarfimmi sulisuuvoq
Uummannamut tikereernerminit coronavirusimik tunillatsissimasutut ullumi paasineqartoq, peqqinnissaqarfiup iluani sulisuuvoq.
Coronavirusimik tunillatsissimasutut paasineqartoq Uummannami peqqinnissaqarfimmi sulisuuvoq Danmarkimiillu sapaatip akunnerata missaa matuma siorna tikissimalluni.
Nunatta nakorsaanerata Henrik L. Hansenip Sermitsiaq.AG-mut uppernarsarpaa.
Pineqartoq tikinnerminit ullut arfineq-marluk qaangiunneranni misissortippoq, tunillatsissimasorlu paasineqarluni. Ilisimatitsissutigineqarpoq pineqartoq Uummannamiittoq.
Sermitsiaq.AG-p maanna uppernarsiniarsaraa angalasimasoq angerlarsimaannaqqaarsimanersoq, angalasorlu Uummannamut angalannginnermini Ilulissani ullut tallimat uninngaqqaarsimanersoq, nalunaarut naapertorlugu.
Angalasoq angerlarsimaannarsimanersoq, Danmarkimiillu tikinnerminit ingerlaannartumik Uummannamut angalasinnaanermut immikkut akuerineqarsimanersoq pillugu, nakorsaaneq Kalaallit Nunaata Politiiviluunniit suli oqaaseqarsinnaanngillat.
Nakorsaanerup ilisimatitsissutigaa peqqinnissaqarfimmi sulisunut Peqqinnissaqarfimmi Aqutsisut immikkut akuersissuteqartarnermik suliaqartartut. Angalanermut tunngatillugu paasissutissat pisariaqartut politiinit maanna paasiniarneqarput.
Nalunaarutigineqartumi siullermi ilisimatitsissutigineqarpoq Uummannami tunillaassortoqarnissaanut aarlerinaat annikitsutut nalilerneqartoq.