Uummannami triatlonertitsisoqarnera naammassilluarpoq
Uummannami timersortoqarnerulernissaanik anguniagaqartoq, peqatigiiffik Siku Cross, triatlonimik unammisitseqqammerpoq. Unammisitsineq kingulliunngitsoq aaqqissuisut nalunaarutigaat.
Uummannami triatlonertitsisoqarnerani qajamik, cykkilimik arpannermillu unammisitsisoqarpoq, tassani iligiit arfinillit peqataapput. Taamatut unammisitsineq kingulliunngitsoq Siku Crossimit oqaatigineqarpoq.
- Triatlonimik unammisitsisoqarnera nuanneqaaq, unammisitsinermi iligiinni pingasuusuni ataaseq qajartorpoq, ataaseq cykkilerluni ataaserlu arpalluni. Aaqqissuussineq nuanneqaaq, taamaattumik taamatut aaqqissuusseqqinnissarput naatsorsuutigaarput, aaqqissuisoq Anguteeraq Grønvold oqarpoq.
Iligiit pingasukkaarput, imalu unammineq agguataarlugu:
- Qajartornermi kilometerit pingasut
- Arpannermi kilometerit pingasut
- Cykkilernermi kilometerit arfinillit
- Illoqarfitsinni timersortoqarnerulernissaa ataqatigiittoqarnerulernissaalu anguniagaraarput. Siullermeertumik taamatut aaqqissuigatta soqutigineqarluartoq oqaatigineqarsinnaavoq. Aaqqissuussineq nuanneqaaq, Anguteeraq Grønvold Sermitsiaq.AG-mut oqarpoq.
Kinguaariit iligiinni ataatsini
Rene N Fleischer (qajartortoq), Jens Thorin (cykkilertoq) aamma Anguteeraq Grønvold (arpattoq) unammisitsinermi ajugaasuupput, taakku minutsit 40-t sekundtillu 14-it unammisitsineq atorpaat, unammisitsinerlu arfininngormat ingerlanneqarpoq.
Anton Overballe, Sir Braden A aamma Arnarissoq Møller aappaattut inissipput, unammineq minutsit 40-t sekundillu 45-t atorlugit.
Pingajuattut inissittuupput kinguaariit, aataa Apollo Zeeb qajartortoq, akka Pavia Zeeb cykkilertoq kiisalu erngutaasoq Felix A. Nielsen arpattoq. Taakku Siku Crossip unammisitsinerat minutsit 41-t kiisalu sekundtit 58-it atorpaat.
Kræfti anigorniarlugu arpatitsineq
Uummannami timersornermik unammisitsisoqaqqissasoq Anguteeraq Grønvoldip oqaatigaa.
Kræfti anigorniarlugu ukioq kingulleq arpatitsisoqarnerani peqataasut 55-iupput.
Akunnerni 24-ni arpatitsisoqassasoq ilisimatitsissutigaa, tassani minutsini katersinerni, katersat aningaasaliisunit kræftimut akiuiniaqatigiiffimmut Kræftens Bekæmpelse-mut aningaasat katersorneqartut nassiunneqassasut ilisimatitsissutigalugu.
- Ukioq manna peqataasut amerlanerunissaat neriuutigaara, tamanna septembarip pingajuani pissaaq. Inoqassuseq eqqarsaatigalugu 55-t peqataanerat ajunngeqaaq, taamaattumik amerlaqqatai peqataasinnaappata naammagisimaassavarput, Anguteeraq Grønvold oqarpoq.
Aningaasaliisussanik ujaasisoqalereernissaa peqataasussanut kaammattuutigaa, taamaasilluni aningaasat nassiunneqartussat qulakkeerneqareersinnaassammata.