Uummannami Royal Greenlandip sulisuni 30-t angerlartiinnarpai
Uummannami tunisassiorfik tunisassiassaaleqivoq.
Uummannami Royal Greenlandimi sulisut 30-it ataasinngornermi angerlartiinnarneqarput, tunisassiorfimmi tunisassiassaarukkallarpoq. RG nittartakkamini taama nutaarsiassiivoq.
- Ullumikkut (ataasinngornermi, aaqq.) saarullinnik panersigassanik tunisassiorpugut, kisianni sila pissutigalugu aamma aalisartut qilalugarniarnerat pissutigalugu tunisassiassaqannginnatta allatut ajornatumik sulisut 30-t ullumi angerlartittariaqarpagut. Naluara qaqugu tunisassioqqilissanerluta, Uummannami Royal Greenlandip tunisassiorfiani ingerlatsisoq, Kirsten Kristensen Worm nittartakkamut oqarpoq .
Royal Greenlandip suli sikunnginnera pissutigalugu tunisassiassaaleqilertussaalluni siusissukkut ilisimaleramiuk decemberip sisamaanili suliffissarsiuussisarfimmut Majoriamut sulisunik angerlartitsiinnartariaqartussaanertik pillugu nalunaarutigaat.
- Sulisunik angerlartitsinnaartariaqalersinnaanerput pillugu suliffissarsiuussisarfimmut Majoriamut siusissukkut allagaqarlunga nalunaaruteqarnikuunera tunngavigalugu sulisuvut arlaqartut Majoriaq aqqutigalugu allamik suliffissarsipput, Kirsten Kristensen Worm oqarpoq. Taassuma aamma oqaatigaa sulisunik angerlartitsisariaqalernissartik Uummannami sulisartut peqatigiiffiannut USIP-imut aamma siusissukkut nalunaarutigisimallugu.
Uummannami Royal Greenlandip tunisassiorfianut aalisartut tuniseqqittalerpata sulisut aggersarneqarumaarput.