Uummannami qaleraleqassuseq illersorneqartariaqartoq
Aqutsiveqarfik Uummannami qalerallit milliartortut biologit misissuinerisa takutippaat. Qaleraleqassuserlu illersorniarlugu siusinaartumik iliuuseqartoqartariaqartoq, Uummannami aalisartut piniartullu peqatigiiffiat isumaqarpoq.
Aasap ingerlanerani Pinngortitaleriffiup umiarsuaa misissuut Sanna, ilaatigut qalerallit angissusaat pillugit Uummannap, Ukkusissat, Saattut, Illorsuit Ikerasaallu eqqaani misissuivoq.
Aviisi Sermitsiaq taama allappoq.
Ukiut kingulliit amerlasuut Uummannap eqqaani qaleraleqassuseq aalaakkaasuusimasoq misissuinerit takutikkaluaraat, taamaattoq ukiut tallimat arfinillillu ingerlaneranni qalerallit milliartulersimasut, piffissami tassani pisarineqartartut qaffariangaatsiarsimasut, misissuinerat takutippaattaaq. Uummannallu eqqaani maannakkut aalisarneq annertutigiinnassappat, tamanna ukiuni tulliuttuni qalerallit milliartuinnarnissaannik kinguneqarsinnaasoq, Pinngortitaleriffimmi Aalisakkanut Qalerualinnullu Immikkoortortaqarfimmi biologi ilisimatusartorlu, Rasmus Nygaard oqarpoq. Qalerallillu miliartorlutillu ikiliartunnginnissaat qulakkeerniarlugu iliuuseqartoqartariaqartoq, Uummannami aalisartut piniartullu peqatigiiffiat isumaqarpoq.
Aviisimi Sermitsiami atuarnerusinnaavutit. Aviisi uani pissarsiariuk: