Uummannami meeqqat angerlarsimaffiata eqqaani ikuallattoq

Uummannami meeqqat angerlarsimaffiata illuutaasa ilaat ikuallattoq, politiit sapaatiummat nalunaarfigineqarput. KNR taama allappoq.

Ikuallattoqarnerani ajoqusertoqanngilaq. Ann Andreassen, meeqqat angerlarsimaffiani pisortaq taama ilisimatitsivoq.

- Meeqqat ajunngillat. Ikuallattoqarnerani inersimasunit paarilluarneqaramik isumagineqarluarlutillu ajunngillat, Uummannami meeqqat angerlarsimaffianni pisortaq, Ann Andreassen KNR-imut taama oqarpoq nangillunilu.

- Toqqissisimavugut. Taamaalilluta aamma meerartagut isumagilluarsinnaavagut. Qatserisartummi politiillu sulilluarnerat isigisinnaavarput. Taakkualu pisinnaasartik tamaat atorlugu ikuallanneq qamisarpaat, Ann Andreasen oqarpoq.

Qamisaaneq erloqinartoq

Qamisaanermi imeq annertooq atorneqarpoq, tamassumalu kinguneranik illoqarfik imeerukkaluarluni. Qatserisartullu meeqqat angerlarsimaffiata eqqaani ataasinngornerup unnuaata tungaanut qamisaasariaqarsimapput. Illu meeqqat angerlarsimaffianni najugaqarsimasut namminiilertigatik najugarisaraluarpaat.

Ikuallattoqarnerani illu aseruatitingaatsiarpoq, ikuallannermullu suna pissutaanersoq politiit maanna paasinialeruttorpaat.