Uummannami imeq uuliartaqarunnaarpoq
Uummannami killerni imermut aqqusersuutit naammaginartumik pitsaassuseqalersut naliliisoqarpoq, taamaattumillu imeq imertut imigassatut atorneqarsinnaalerluni. Taamaasilluni illoqarfimmi imermik mingutitsisoqarunnaarpoq
Uummannami innuttaasut erngup mingutsinneqarnera eqqarsaatigisariaqarunnaarpaat.
Tassami illoqarfik tamakkerlugu imermut aqqusersuutit imermut imigassamut atorneqarsinnaalersut Namminersorlutik Oqartussat tusagassiutinut nalunaaruteqarput.
- Pinngortitamut Avatangiisinullu Naalakkersuisoqarfik nakorsaaneq isumasioqatigereerlugu naliliivoq, Uummannami killerni imermut aqqusersuutit naammaginartumik pitsaassuseqalersut, taamaattumillu imeq imertut imigassatut atorneqarsinnaalerluni ullumi tallimanngornermit, nalunaarutigineqarpoq.
Qaammatit marluk
Uummannami erngup uuliamik mingutsinneqarnera septembarip aqqarngani pivoq. Mingutsitsisoqarsimanera septemberip 20-ani paasineqarpoq, erngertumillu erngup kuuffimmit kuuttup atorneqannginnissaa imerneqannginnissaalu nalunaarutigineqarluni.
Inuup kukkuluttornerata kinguneranit innuttaasut imermik atuissagaangamik imissagaangamilluunniit, illoqarfimmi imernut tankinut imertariartortariaqalerput taamatut pisoqareerneratigut. Imertartarfiusinnaasut tankersuit aqqaneq-marluk illoqarfiup iluani sumiiffinni aalajangersimasuni inissinneqarsimapput.