Uummannami imeq imigassaq uuliamik akoqalaalersimasoq
Pilersuinerup akornuteqarneratigut Uummannami erngup aqqutaasa ilaat uuliamik akoqalersimapput. Imerli suli imerneqarsinnaavoq.
Namminersorlutik Oqartussat Uummannami imermi imigassami uuliamik annikitsunnguamik nassaarsimapput. Decembarip aqqarnani msissuisoqarmat, decembarip 21-ani Ilisimatusarnermut Avatangiisinullu Naalakkersuisoqarfimmut nassiunneqarsimasumi tamanna paasineqarpoq.
Imerli suli imerneqarsinnaasoq oqaatigineqarpoq:
- Ilisimatusarnermut Avatangiisinullu Naalakkersuisoqarfiup Kalaallit Nunaanni Nakorsaaneq isumasioqatigereerlugu nalilerpaa tamanna peqqissutsimut ajoqutaanngitsoq, Uummannamilu imeq suli imerneqarsinnaasoq, Namminersorlutik Oqartussat tusagassiorfinnut nalunaaruteqarnerminni allapput.
Pilersuinerup akornuteqarneranik pissuteqartoq
Namminersorlutik Oqartussanit oqaatigineqarpoq, 2020-mi decembarip aqqarnani imermik pilersuineq akornuteqalersimasoq, taamaattumillu piffissami sivikitsumi qaminneqarsimalluni. Erngup aqqutaa imermik immerneqaqqimmat, ruujorit qalippernerinit uuliamineq kaanngarluni imermik pilersuinermut aqqusersuutit ilaannut siaruaassimavoq.
- Misissugasat ullormi ingerlatsinermik unittoorfiusumi tiguneqartut uuliamik akoqartut paasineqarpoq. Tamatuma kingorna Nukissiorfinnit erngup aqqutaa biilillu imertaassuit salinniarlugit imeq kuutsinneqaqattaarpoq, naatsorsuutigineqarporlu imeq uuliamik akoqarunnaarsimassasoq, Namminersorlutik Oqartussat allapput.
2019-imi Uummannami imermik pilersuineq qaammatini arlalinni akornuserneqarsimavoq, uuliamik taamatut ittumik nassaartoqarmat. Taamanikkut illoqarfiup imeqarfianut kukkusumik uulia kuineqarsimagami.