Uummannami aalisartut ikiorserneqalersut
Uummannami imeqarniarnikkut ajornartorsiuteqarneq pissutigalugu, Royal Greenlandip, aalisakkanik aalisakkerivinnut allanut assartuisussamik, umiarsuliinissaa Naalakkersuisut akuerisimavaat
- Uummannami imiup uuliamik mingutsinneqarsimanera pissutigalugu tunisisoqarsinnaannginnera iluarsiiffiginiarlugu aalajangiisoqarpoq, Naalakkersuisut tusagassiorfinnut nalunaaruteqarnerminni ilisimatitsipput.
Akuersissut atuutissaaq, Uummannami aalisakkeriviup tunisassiornissamut imermik mingoqanngitsumik pissaqannginnera tamaat, taamatut nassuiaasoqarpoq.
Angallat Sermilik, aalisakkanik suli suliarineqanngitsunik Uummannamiit Royal Greenlandip aalisakkeriviutaanut allanut assartuisassaaq. Tassa angallat Uummannap, Ilulissat Qasigiannguillu akornanni uteqattaarluni assartuisassaaq.
Sermilik ullut marlussuit ingerlaneranni Uummannamut tikissangatinneqarpoq.
Uummannami imermut tunngatillugu kanngunartuliortoqarnerata kingorna, najukkami aalisakkeivimmi sulisut erngup mingutsinneqarsimanera pissutigalugu sulisinnaanngimmata umiarsuarmik tunitsiviliisoqarnissaanik Karl-Kristian Kruse ataasinngormat piumasaqarpoq.