Uummannami aalisarnikkut ajalusoortoqarsinnaasoq

Qaleralittassiissutit ikilineqarnerat aalisarfiillu pisassiiffiunngitsut atorunnaarsinneqarnerat aqutsiveqarfik Uummannami aalisarnermik inuussutissarsiuteqarneq eqqornerlorujussuassagaa, aalisarnermik inuussutissarsiuteqartut isumaqarput.

- Aqutsiveqarfik Uummannami umiatsiaararsortunut pisassiissutigineqartut aasap ingerlanerani nungunnissaat qularutissaanngilaq, Ukkusissani aalisartut piniartullu peqatigiiffianni siulittaasoq, Ville Reimer oqarpoq.

Ukiup matuma aallartinnerani ukioq mannamut qaleralittassiissutit amerlatiginissaat aaliangiiffigineqarmata, aqutsiveqarfik Uummannamut qaleralittassiissutit 9.167 tonsiussasut Naalakkersuisut aaliangerpaat. Ukioq manna qaleralittassiissutit aalisarfik 47-mut tunniuneqartut siornamut naleqqiullugu 1.000 tonsit missaannik ikinnerupput, taassumalu qaavatigut aalisarfiit pisassiiviunngitsut, umiatsiaararsortunit angallatiniillu killilersugaanngitsumik aalisarfigineqarsinnaasut, siorna 1.300 tonsit missaannik pisaqarfigineqarsimasut, tamaasa atorunnaarsinneqarput.

Pisassissuutaasartut arriitsumik ikilisikkiartuaarneqarnerisut, aqutsiveqarfinni Qeqertarsuup Tunuani, Uummannami Upernavimmilu nungusaataanngitsumik aalisarneq Naalakkersuisut qulakkeerniarpaat. Aalisarnikkulli taamatut politikkikkut siunnerfeqarneq Uummannami eqqaanilu aalisarnermik inuussutissarsiuteqarnermut annertuumik innarliisinnaasoq, aalisarnermik inuussutissarsiuteqartut isumaqarput.

Isertitassat amerlasuut annaaneqassasut

Aalisarnerup ilarujussua killilersugaanngitsunik aalisarfigineqarsinnaasuni ingerlanneqartarpoq. Angallatinut qaleralittassiissutit arriitsuinnarmik nungukkiartortarnerat, angallatit ilaatigut killilersugaanngitsumik aalisarfigineqarsinnaasuni aalisartarnerannik pissuteqarpoq. Aaliangersakkalli nutaat atuutilernerisigut tamanna allanngorluinnassasoq, aalisarneq pillugu ilisimasaqarluartut, kinaassutsiminnillu isertuussisut, isumaqarput. Pineqartut kinaassusaat aaqqissuisoqarfimmiit ilisimaneqarput. Taamaatut aaliangertoqarneratigut qalerallit 2.300 tonsit missaat peerneqarput, taakkulu agguaqatigiisillugu kilomut 20 kroninik akeqarput. Taamaalilluni aalisartut isertitassaralui siornatigumut naleqqiullugu 46 millioner kronit missaannik ikinnerussasut naatsorsuutigineqarpoq.

Allaaserineqartoq aviisimi Sermitsiami tamakkiisumik atuaruk. Aviisi uani pisiarineqarsinnaavoq:

Powered by Labrador CMS