rabies

Uumasut nakorsaat: Kangerlussuarmi teriannissat qanillinagit

Sanne Eline Wennerberg: – Kangerlussuarmi najugallit kajumissaassavakka teriannissanik takugaangamik politiinut attaveqartaqqullugit

Ræve hvalpe
Teriannissat piaraallutik inequnartaqaat, perleruleraangamilli inequnarneq ajorput.

Kangerlussuarmi politiit nalunaarput terianniat qaasoqisut inunnullu qunusueqisut nunaqarfimmut suli qaninngoortartut, innuttaasunut, biilinut biilertunullu allaat qaninngoortaqalutik.

Kangerlussuarmi politiit innuttaasunit saaffigineqarlutik arlaleriarlutik orniguttarsimapput, namminersorlutik oqartussanit tusagassiorfinnut nalunaarummi allassimavoq.

– Terianniaqarfiusunut takusaajartortuassapput, teriannianillu toqutsisassallutik, uumasut nakorsaat Sanne Eline Wennerberg oqarpoq.

– Kangerlussuarmi innuttaasut kajumissaarusuppakka terianniamik naammattuuisimagunik, tamanna politiinut nalunaarutigisaqqullugu, Sanne Eline Wennerberg oqarpoq, mianersoqqussutigalugulu innuttaasut teriannianut qanilleqqunagit.

– Terianniat qanittuaqqamiittut assilissallugit soqutiginartartorujussuugaluartoq, taamaattoq qanillineqartassanngillat. Inuk terianniamik perlerortumit kiineqartoq perlerornermik nappaateqalersinnaavoq. Nappaat navianartorujussuuvoq toqqutsigineqarsinnaalluni, Sanne Eline Wennerberg erseqqissaavoq.

Perlerorput

Kangerlussuarmi politiit oktobarip 12-anni ilisimatitsipput teriannianik marlunnik eqqumiitsunik pissusilersortunik toqutsisimallutik, taakkulu niaqui perlerorneri qularnaarniarlugit nassiunneqartut.

Uumasut nakorsaat ilisimatinneqarsimavoq terianniat perlerortuusut.

Qeqqata Kommuniata qimmilerisuata qimmiutilinnut attaveqartuusup qimmiaqqat marlunnit qaammatillit sapaatip akunnerata tullianit akiuussutissamik kapisartussaavai.

Teriannissamik eqqumiitsumik pissusilersortumik takuguit attaveqarfigisinnaavat: Uumasut Nakorsaqarfiat Inuussutissalerinermullu Oqartussaaffik. E-mail:uumasut@nanoq.gl

Powered by Labrador CMS