Uumasut nakorsaannik amigaateqarneq toqqissisimanngitsitsivoq
Kujataani uumasunut nakorsaqannginnera ajornartorsiutaavoq. Savaatillit Peqatigiit siulittaasuat, Nuummi qitiusumik uumasut nakorsaqarfiannik pilersaaruteqartoqarneranik qiimmatsaateqanngitsoq, taama isumaqarpoq.
Savat, hiistit aamma nersutit kiisalu uumasuutit qimmit qitsuillu.
Tamakku Kujataani nunaateqarfiusumi nassaassaapput, tamakku kangerlunni naggorissoqarfiusuni qitiusumik ilisarnaataapput. Kisianni juunimi 2022-mili uumasunut nakorsaqanngilaq – tamannalu ajornartorsiutaavoq.
Savaatillit Peqatigiit siulittaasuat Elna Jensen taama isumaqarpoq.
Savaatillit akornanni toqqissisimanngitsitsisoq, taanna isumaqarpoq.
- Piareersimasunik sianerfissaqanngilagut. Penicillininik tunniussissagutta uumasut nakorsaat oqaloqatigeqqaartussaavarput, kisianni uumasut nalunaaquttap 8 aamma 16 akornanni kisimi napparsimasanngillat. Tamanna ajornartorsiutaavoq.
Upernaakkut savat piaqqinerat
Ullumikkut Nuummi Namminersorlutik Oqartussat aqqutigalugit sianertoqartartoq, siulittaasoq ilisimatitsivoq. Aasaq taamaattoqanngikkaluarpoq. Oqarasuaammut piareersimasumut Qaqortumilu uumasut nakorsaannut piffissaq apeqqutaatinnagu sianertoqarsinnaavoq.
Elna Jensenip upernaakkut savat piaqqinissaat pingaartumik ernumanartippaa, pingaartumillu uumasup nakorsaata najuulluni ikiuisinnaannginnissaa.
- Uumasup nakorsaanik attaveqarnissamut pisariaqartitsisoqartarpoq – ilaatigut pinartoqarnerani uumasup nakorsaat orniguttariaqartarluni.
Uumasut nalinginnaasumik peqqissusaat atugarissaarnerallu eqqarsaatigalugu, uumasup nakorsaata savaateqarfinniittarnissaa pisariaqartinneqartoq, taanna nassuiaavoq, uumasullu nakorsaata attaveqarfiginerata attannissaa pisariaqartinneqartarpoq.
Aaqqiissut alla
Kujataani uumasut nakorsaat piffissami sivikitsumi atorfeqareerluni aallarpoq, inuttassarsiuussinermilu annertuumik ajornartorsiortoqareersoq maanna uumasut nakorsaqarfiata Nuummut inissinneqarnissaa pilersaarusiorneqarpoq, uumasullu nakorsaat nunatsinni tassanngaanniit angalasinnaassapput.
Aalisarnermut Piniarnermut naalakkersuisoq Karl Tobiassen, paragraf 37 naapertorlugu apeqqutinut taama akissuteqarpoq. Aaqqiissulli tamanna pitsaanerpaanngilaq, Elna Jensen taama isumaqarpoq.
- Qaqortumi ilisarisimasamik aamma piaartumik angallammik tikissinnaasumik uumasut nakorsaqarnera toqqissisimanartuuvoq, pingaartumik savat piaqqinerisa nalaanni aamma aasaanerani.
Siulittaasup oqarnera naapertorlugu uumasut amerlanerusut toqunneqartalernerannik kinguneqarsinnaavoq. Uumasut nakorsaannik Danmarkip avataani pissarsiortoqartariaqartoq taanna oqarpoq, assersuutigalugu Islandimit, Norgemit aamma Tysklandimit uumasut nakorsaannik atorfinitsitsinissamut periarfissat ujartorneqartariaqarnerarpai.
- Islandimi pitsaasunik maani pissutsinut sungiussisimasunik uumasunut nakorsarpassuaqarpoq.