uulia
Uuliasiortuni taamaallaat tunumi
Jameson Landimi uuliasiorneq nangeqqinneqartoq
Januaarip aallaqaataaniit uuliasioqatigiiffiit Kalalalit Nunaanni uuliasiornerat taamaallaat Tunumi ingerlanneqassaaq, tassani Namminersorlutik Oqartussat Tunup avannaarsuata imartaani tallimanik akuersissuteqarlutik Ittoqqortoormiillu eqqaani Jameson Landimi nunami marlunnik akuersissuteqarlutik.
Uuliasioqatigiiffiit 2013-imi Tunup avannaarsuani imaani akuersissuteqarfigineqartut sikoqassutsikkut atugarissaarsimapput, ukiorlu manna piffissap akuersissuteqarfiup affaani siullermik sajuppillatsitsisarlutik katersinissamik piumasaqaat naammassereersimallugu. 2017-imi Tunup imartaani sajuppillatsitsisarluni misissuinernik ingerlatsisoqarniarunanngilaq.
Oliasiortut nutaat
Suliffeqarfiit marluk 2014-imi Jameson Landimi Namminersorlutik Oqartussat neqeroorutaanik ilassinnipput, marluullutillu sumiiffik ataaseq akuersissuteqarfiginiarlugu qinnuteqarfigaat. Namminersorlutik Oqartussat tuluit suliffeqarfiutaat Greenland Gas & Oil Plc toqqarpaat, taannalu katillugit 5.495 kvadratkilometeriusumi ujaasinissamut marlunnik akuersissuteqarfigineqarpoq.