Skip to main content

Uuliasiorneq gassisiornerlu aalajaallisimasoq

Kalaallit Nunaanni uuliasiorlunilu gassisiornerup ukiuni arlalinni kinguariartuinnavissimanera 2018-imi 2019-imilu unitsineqarsimavoq.

Kalaallit Nunaanni uuliasiorluni gassisiorluni misissuinerup iluani ineriartorneq, ukiut arlallit akuersissutit utertinneqartarlutik kinguariartoreernerup kingorna aalajaalliseqqinneqarpoq.

Naalakkersuisut nunami maani uuliasiorneq gassisiornerlu pillugit nassuiaammi saqqummiunneqaqqamersumi taamatut inerniliipput.

- Immikkut erseqqissarneqarsinnaavoq, misissuinermut ingerlatseqatigiiffik ataaseq Tunumi Jameson Landimi nunami misissuilluni qillerinernik sisamat tikillugit akuerineqarnissaminut sulissuteqarnermik aallartitsisimasoq.

- Taamaattoqassappat, Cairn Energy-p 2010/11-imi qillerinermik ingerlatsereernerata kingorna Kalaallit Nunaanni qillerinermut pilersaarummik tamakkiisumik aatsaat siullermeertumik ingerlatsisoqassaaq, Nukissiuuteqarnermut Naalakkersuisoq Steen Lynge nassuiaammi allappoq.

Akuersissutit tunniunneqarsimasut 2014-imi amerlanerpaasimasut

23. juni 2020-mi ikummatissiassanut misissueqqaarnissamut akuersissutit ingerlatsivigineqartut arfineq-marluupput aammalu ikummatissiassanut misissuinissamut akuersissutit ingerlatsivigineqartut sisamaallutik, nassuiammi allassimavoq.

Misissueqqaarnerit taakkua sumiiffimmi pineqartuni misissuinerpiamik aallartitsinissamut tunngavissaqarnersoq paasinarsisinniarlugu ingerlanneqartarput.

Misissuinissamut akuersissutit kisermaassisussaatitaatitsisarput aammalu ukiut qulit angullugit imaluunniit pisuni immikkut ittuni ukiut 16-it angullugit misissuinissaq piffissalerlugu tunniunneqartarput.

Akuersissutit tunniunneqarsimasut 2014-imi amerlanerpaasimapput, misissueqqaarnissamut akuersissutit 23-usimallutik misissuinissamullu akuersissutit aamma 23-usimallutik. Tamtuma kingorna 2019-ip tungaanut ikiliartuinnavissimapput, 2020-mi 2019-imisulli akuersissutit katillugit aqqanillit tunniunneqarsimapput.

Nakkutilliisoqarsimanngitsoq

Nassuiaat naapertorlugu uuliasiorfiit 2108-imi Kalaallit Nunaanni misissuinerminnut 79 millioner koruunit atorsimavaat, kisitsisit taakku pissarsiarineqarsinnaasut kingullersaraat. 2011-mi uuliasiorfiit aningaasaliissuteqarnerpaasimapput, Kalaallit Nunaanni uuliamik ujaasinerminni 4,4 milliarder koruunit atorsimagamikkit.

Ingerlatseqartigiiffiit akuersissuteqartut inatsimmik malinninnersut nakkutiginiarlugit Namminersorlutik Oqartussat nakkutilliisussaapput. Nassuiaammili allassimavoq, 2018-imi 2019-imilu suliarineqarsimasut annikittuinnaammata nakkutilliisoqarsimanngitsoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER