Uuliap peerniarnissaa ulorianarpallaartoq
Polar Seafood isumaqarpoq, Avatangiisinut Naalakkersuisoqarfimmit Qeqertarsuup Tunuani kilisaammit kiveqqasumit uuliap peerneqarnissaanut piffissaliussap malinnissaa ajornarluinnartoq. Aammami uulia aalannguutereersimanngikkuni imaanut aniareersimassasoq, ingerlatseqatigiiffik isumaqarpoq. Uulia peerneqassaaq, najukkami IA-meersut oqarput.
Polar Seafood suli isumaqarpoq Avatangiisinut Naalakkersuisoqarfiup uuliap peerneqarnissaanik imaluunniit kilisaatip kiveqqasup qaqinneqarnissaanik peqqussutaata naammassiniarnissaa ulorianarpallaarlunilu teknikkikkut ajornarluinnartuusoq.
Aviisi AG taama allappoq.
Taarsiullugu Polar Seafoodip siunnersuutigiinnarpaa, Qeqertarsuup Tunuani kiviffiusimasup eqqaa uuliamik mingutsitsisoqarsinnaaneranut alaatsinaanneqassasoq.
Inuit inuunerannik ulorianartorsiortitsinani uuliani peerneqarsinnaananilu kilisaat qaqinneqarsinnaanngilaq, Polar Aassik 310 meterinik itissusilimmiimmat, Polar Seafood isumaqarpoq.
Polar Aassik brød Qasigiannguit eqqaanni uuliamik 53.000 liiterinik orsussaasivimmiittoqarluni marsimi ikuallalerpoq kivillunilu.
Avatangiisinut Naalakkersuisoqarfiup Polar Seafooq qaammatit arlallit matuma siorna nalunaarfigaa, ukioq manna oktobarip 31-a nallertinnagu kilisaat uuliamik imaaqqullugu, uulia suujunnaarseqqullugu imaluunniit kilisaat qaqeqqullugu.
Ingerlatseqatigiiffik sooq taama pisoqarsimaneranut nassuiaateqarnissamut kingusinnerpaamik aggustip 15-iani piffissalerneqarpoq.
Polar Seafoodip ITOPF, nunat tamalaat akornanni ingerlatsivik imaani avatangiisinik mingutsitsinermik immikkut ilisimasalik, umiiarnerup imaanillu mingutsitsisoqarsinnaaneranik aarlerinaatip nalilersuiffiginissaannik , qinnuigisimavaa.
Aviisimi AG-mi atuarnerusinnaavutit. Aviisi uani pissarsiariuk: