Uuliamut tapiliuttagaq affangajammik apparneqassaaq

Royal Arctic Linep uuliamut aningaasallu nalinginut tapiliuttakkamik taagorneqartoq 1. februar apparteqqinniarpaa. Tapiliuttagaq 2022-mi annertussusaanit appasinnerussaaq.

Uuliamut aningaasallu nalinginut tapiliuttakkamut tunngatillugu Royal Arctic Linemit nutaarsiassatsialaqaqqippoq, taanna apparneqaqqilerpoq.

Tapiliussaq umiarsuaatileqatigiiffiup Kalaallit Nunaannut nassiussaanut tamanut ilanngunneqassaaq, tapiliussaq qaffasinnerpaagami aggustimi siorna 30 procentiuvoq, tamanna Ruslandip Ukrainemut sorsunnerata malitsigisaanik orsussat akiisa qaffasinnerujussuinik pissuteqarpoq.

Uuliap akiisa aningaasallu nalingisa appariartornerat pissutigalugu uuliamut aningaasallu nalinginut tapiliussaq 1. februar aallarnerfigalugu 7,18 procentinut aparneqassasoq, Royal Arctic Line ataasinngornermi nittartakkaminut allappoq.

Tapiliussaq iluanaarutigineqanngitsoq

Tapiliussaq januaarimi 13,47 procentiuvoq, taamaalillunilu affangajammik apparneqartussanngorpoq.

Februaarip aallaqqaataanit tapiliussaq, 2022-mi tapiliussanit appasinnerussaaq. Tassami Royal Arctic Linep ukiup aallartinnerani tapiliussaq 6,3 procentinit 13,6 procentinut 1. januar 2022-mit qaffattariaqarsimavaa. Tamatuma kingorna tapiliussaq qaffakkiartuinnarpoq, aggustimilu qaffasinnerpaalerluni. Kingorna Naalakkersuisut ikiorsiissuteqarput, 2022-llu qaammataanni kingullerni tapiliussaq appartinneqarpoq.

Ingerlatseqatigiiffiup uuliamut aningaasallu nalinginut tapiliussaq iluanaaruteqarfiginngikkaa, Royal Arctic Linep oqaatigaa, ingerlatseqatigiiffiup uuliap akiinut aningaasallu nalingisa aarlerinartoqarnerinut qularnaveeqqutitut taamaallaat atorneqartarmat.


Powered by Labrador CMS