Uuliamut periusissiaq nutaaq isornartorsiorujussuarpaat
Kalaallit Nunaanni Sulisitsisut Peqatigiiffiata siunnersuutigaa uuliamut siunnersuisoqatigiinnik, aningaasanut siunnersuisoqatigiittut ittumik, pilersitsisoqassasoq
Naalakkersuisut piffissami 2019-23-imut uuliamut periusissiamik tusarniaatitsinerat Kalaallit Nunaanni Sulisitsisut Peqatigiiffiata kukkusumik taaguuserneqarsimasutut oqaatigaa.
Soqutigisaqaqatigiiffik naliliivoq uuliamut periusissiaq taamatut isikkoqartilluni tassaaginnartoq aallarnisaataasumik isumaliutinik katersuiffik, qularnanngitsumik kingorna peqqissaarullugu periusissiamut ilanngunneqarumaartoq.
– Periusissiatut taaneqarpoq, naami periusissiaanngivippoq. Periusissiamut tusarniaavigineqartumut ilapittuutaavoq, takujuminaatsipparpulli Kalaallit Nunaanni uuliamik gas-imillu ujaasinermi piiaanermilu taama aalajangiisuutigisuni namminersorlutik oqartussat sumut killiffeqarnersut, pisortaq Brian Buus Pedersen Sermitsiamut oqarpoq.
Sivikippallaarujussuartoq
2019-23-imut uuliamut periusissiaq 2014-18-imut aatsitassarsiornermut periusissiamut, taarsigassaanut, sanilliullugu aalajangiisuusumik allannguuteqarpoq. Periusissiatoqqami avataani uuliasiornermit milliardillit sinnattorineqarsimasut, periusissiami nutaami piffissamut sivikitsumut akunnattumillu sivisussusilimmut nunami annikitsumik uuliasiornissaq siunniunneqarpoq.
Sulisitsisut Peqatigiiffiat isumaqarpoq ukiunut sisamanut periusissiorneq sivikippallaarujussuartoq, tamanna uuliasioqatigiiffiit nunanit tamalaaneersut toqqissisimalernissaannut sivikippallaarmat, tamakkua uuliamik ujaasinerminni ulorianartulimmi akisoorujussuarmilu piffissamut sivisunerujussuarmut pilersaarusiortarmata.
Taamatuttaaq uuliamut periusissiaq nutaaq pissutigalugu inatsit maanna atuuttoq, uuliasiortullu sinaakkutassatut atugassarisaat, allanngortittariaqarput, kingullerlu aatsaat periusissiap akuerissutigineqareernerani allanngortinneqassaaq.
Allaaserineqartoq aviisimi Sermitsiami tamakkiisumik atuarneqarsinnaavoq. Aviisi uani pisiariuk: