Uuliakoornermik akiunissamut piareersimasut
Meyer Kaspersen Greenland Oil Spill Responsemi aallaqqaataaniilli kajumissutsimik suleqataasuuvoq.
Meyer Kaspersen sivisuumik issiaannarsinnaanngitsuuvoq.
- Sulineq nuannaraara, taanna Sermitsiaq.AG-mut oqarpoq.
Taama oqarsinnarluni assassorluni aamma teknikkikkut suliffigisimasarpassuani taakkartorpai – tusagassiortup allattuisinnaaneranit sukkanerulluni.
Tamatuma saniatigut ukiorpassuarni taekwon-dortarlunilu sungiusaasarpoq.
Greenland Oil Spill Responsemilu kajumissutsimik suleqataavoq, 2012-imilu aallartinneraniilli peqataalersimavoq. Imaluunniit eqqornerusumik oqaatigalugu ilaatigut akissarsissutigisartakkaminik kajumissutsimik sulisuuvoq, tassami sungiusaraangamik imaluunniit ilinniaraangamik akissarsisarput, kisianni upalungaarsimanermi aningaasarsiuteqanngillat.
Taamaakkaluartoq ajutoortoqassagaluarpat, uliakoortoqassagaluarpat suliartornissamut piareersimavoq.
- Atorneqarsinnaasunik ilikkagarpassuaqartarpugut aamma ikinngutiilluarpugut, taanna oqaluttuarpoq.
Maajip naanerani kajumissutsimik sulisut allat peqatigalugit Nuup Kangerluani Qooqquni sungiusarput. Kajumissutsimik sulisut ilai Meyeritut Aasianneerput, ilaallu Nuummit. Suleqataasut 18-nit 60-inut ukioqarput. Meyer ukiunut kingullernut taakkartorneqartunut qaninneruvoq.
Inuusuttut arlallit Meyerip pilerisaarnikuusimavai.
- Una ilanngutsinnikuuara, una aamma una, assigiinngitsunik tikkuartuilluni taanna oqarpoq.
Greenland Oil Spill Responsemi pisortap, Klaus Kuch Jensenip oqaatigaa, kajumissutsimik sulisut suli amerlanerit inissaqartut.
- Uuliakoortoqarnissaanut akiueqataanissamut piummassuseqarnermik piumasaqaammit allanik piumasaqaatitaqanngilaq. Ilinniarnissamut pisariaqartinneqartumut uagut isumaginnittarpugut, taanna Sermitsiaq.AG-mut oqarpoq.
DMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...