ilisimatusarneq
Uuliaarluernermik ilisimatusarnermi Kalaallit Nunaat peqataavoq
Greenland Oil Spill Response nunat tamalaat ingerlatseqatigiiffianni, immani nillertuni uuliaarluernermut upalungaarsimanerup pitsanngorsarnissaanik ilisimatusartumi, peqataavoq
Greenland Oil Spill Response (GOSR) nunani tamalaani suleqatigisat peqatigalugit ingerlatseqatigiiffimmik pilersitsivoq, taassumalu siunertaraa immani nillertuni uuliaarluernermut upalungaarsimanerup pitsanngorsarnissaanik ilisimatusarnissaq. Selskabi namminersorlutik oqartussanit pigineqartoq taamatut paasissutissiivoq.
Ingerlatseqatigiiffik katiterneqarsimavoq finskit avatangiisinut institutiannit SYKE-mit, EU-millu aningaasalerneqarluni.
Ilisimatusarneq
Ingerlatseqatigiiffiup immani nillertuni uuliaarluernermut upalungaarsimanermut periutsit assigiinngitsut ineriartortissavai kiisalu avatangiisitigut sunniuteqaatit nalilersussallugit.
Suliniut 2016-imi marsimi aallartinneqassaaq ukiullu pingasut affarlu sivisussuseqassalluni.
Suliniummi akulerutsinneqarsimapput ilisimatusarfiit ingerlatsiviillu assigiinngitsut katillugit 13-it, nunanit assigiinngitsunit qulingiluaneersut.
39 millioner koruunit
Suliniummut atugassarisatut missingersuutit katillugit 39,4 millioner koruuniupput. Taakkunannga selskabip namminersorlutik oqartussanit pigineqartup 1,7 millioner koruunit akilissavai, taakkualu ilaatigut atorneqassapput misileraanermut atortunik pisinermut kiisalu Kalaallit Nunaanni angallatinik attartornermut.
Sanilliussilluni
– Suliniummi immani nillertuni uuliaarluernermut upalungaarsimanermi periutsit assigiinngitsut ineriartortinnissaat, sanilliunnissaat aammalu pitsaassusaassa nalinerneqarnerat kiisalu avatangiisinut sunniutaat sammineqassapput. Kalaallit Nunaata GOSR-illu immikkut ilisimatusarfigissavaat imaani uuliamik ikuallatsitsineq kiisalu immani nillertuni uuliamik arrorsaatit kemiskiusut atorneqarsinnaanerat, GOSR-ip pisortaanera Lonnie Bogø Wilm tusagassiorfinnut nalunaarutikkut paasissutissiivoq.
Suliniummi angusat nunani tamalaani ingerlatsivinnit, issittumi killeqarfiit akimorlugit immani sulisunit atorneqarsinnaassapput.