Kommuneqarfik Sermersooq
Utoqqarnut innarluutilinnullu aputaajaatitsinissamut 800.000 koruunit
Kommuneqarfik Sermersuumi utoqqaat innarluutillillu aputaajaanermik ikiorneqarusuttut
Utoqqaat innarluutillillu aputaajaassunneqarsinnaanngitsut ikiorneqarnissaannut 800.000 koruunit immikkoortinneqassasut Kommuneqarfik Sermersuumi kommunalbestyrelsip isumaqatigiissutigaa, kommuni paasissutissiivoq.
- Kommuneqarfik Sermersuumi takorluugaavoq anguniagaallunilu utoqqaat innarluutillillu, sapinngisamik sivisunerpaamik najugartik najortassagaat. Tamanna pivisunngortinneqassappat pingaaruteqarluinnarpoq innuttaasut pineqartut namminneerlutik najugartik iserfigisinnaallugulu aniffigisinnaanissaat, kommunip tusagassiuutinut nalunaarutaani oqaatigineqarpoq.
Tamanna piffissami nittaalluarfiusumi ajornakusoorsinnaavoq. Suliniummilu matumani kommunalbestyrelsip neriuutigaa utoqqaat innarluutillillu inuunerannik oqilisaassinnaajumaarlugit.
Sumiiffiit assigiinngissutaartut
Kommuneqarfik Sermersooq isorartoqaaq, tamannalu isumaqarpoq innuttaasunut aputaajaassussinissamut neqeroorutaasinnaasut piffimmiit piffimmut assigiinngissinnaaneri. Tamannalu peqqutigalugu neqeroorutigineqartoq aputaajaanerusinnaavoq imaluunniit pineqartunik pisiniuussineq.
Isumaginninnermut Suliffeqarnermullu Ingerlatsivimmit missaliorneqarpoq, kommunimi innuttaasut 45-it missaat neqeroorummik pisariaqartitsisut.
Utoqqaat innarluutillillu kisimiittut
Aputaajaassineq pisiniussinerluunniit utoqqarnut innarluutilinnullu, suliassamik suliarinnissinnaasunik illoqateqanngittunut neqeroorutaavoq. Inissiaatileqatigiiffimmi, aputaajaanermik akisussaaffimmik tigummiaqartuusumik ineqarfeqaruit, uani ikiorneqarnissamut innersuunneqarsinnaanngilatit.
Neqeroorutaasoq 2018-imi ingerlareerpat, kommunip nalilersussavaa, suliassaq qanorpiaq akeqarnersoq. Taassuma tungaagnut utoqqarnik innarluutilinnillu aputaajaassinissamut 2018-imi 800.000 koruuninik immikkoortitsisoqarpoq.