Utoqqalinersiutit qaffannissaat akuersissutigineqartoq tatiginnikkunnaarnermillu taasineq pinngitsoortinneqarluni
Utoqqalinersianut inatsisip allanngortinneqarnissaanut pingajussaaneerinninneq pikkunartorsiorfioreersoq, Inatsisartuni amerlanerussuteqartut siunnersuut akuersissutigaat.
Utoqqalinersiuteqartut qaammammut akileraarutit sioqqullugit 750 koruuninik pisartagaqarnerulissapput. Tamanna Inatsisartuni amerlanerussuteqartut ullumi 27. maj akuersissutigaat.
Siunnersuummi ukiumut tunngaviusumik pisartakkat 64.239 koruuniniit 73.239 koruuninut qaffanneqarput, akileraarusereernagit ukiumut 9.000 koruuninik ilaneqarlutik.
Utoqqalinersiaqartulli inissianik attartortuusut pisartakkaminnik qaffaavigineqarunik inimut tapisiaqarnerat appartussanngussaaq.
Tamanna Naleqqamit, Demokraatinit aamma Atassummit, suliap pingajussaaneernerani maluginiaqquneqarpoq isornartorsiorneqarlunilu.
- Utoqqalinersiat qaammammut 750 koruuninik qaffanneqarpata, aningaasat utoqqalinersiaqartut kaasarfiannut ikinavianngillat. Pisartakkat amerlanerulerpata, aamma pisortat utoqqalinersiallit kaasarfianiit aallernerusinnaalissapput, Jens Napaattooq oqaluttarfimmiit oqarpoq.
- Salluliorfigineqartutut misigivugut. Minnerunngitsumillu utoqqalinersiuteqartut, inuuniarnermikkut pitsanngorsaavigineqarnissamik neriorsorneqarsimasut, salluliorfigineqarput. Utoqqalinersiutaat qaffanneqassapput, inimulli tapissaat appartariaqalissallutik, oqarpoq.
Tatiginnikkunnaarneq qaqinneqartoq
Oqallinnerup ingerlanerani illuatungiliuttunit, tassa Naleqqamit, Demokraatinit aamma Atassummit, Naalakkersuisunut tatiginnikkunnaarnermik taasititsisoqarnissaanik piumasaqartoqarpoq. Tamannali Naalakkersuisoqatigiinniit pinngitsoortinneqarluni.
Utoqqalinersiat qaffanneqarneranut tunngatillugu, utoqqaat atugaannut tunngatillugu suliat tamaannga killinnginneri, isumaginninnermut Naalakkersuisumit, Jess Svanemit erseqqissarneqarpoq.
- uannaarutissaraarput utoqqaat atugarisaat pitsanngorsaaffigisinnaagatsigit. Utoqqalinersiat amerlineqarnerat ineqarnermut tapiissutit ikinnerulersinneqarnissaannik kinguneqassasoq Naalakkersuisut sianiginngitsuunngilaat, Jess Svane tusagassiorfinnut nalunaaruteqarluni oqarpoq.
- Sulinerli tamaanga uninngilaq Naalakkersuisut ukiuni tulliuttuni utoqqaat taakkununngalu soqutigisaqartut allat suleqatigalugit utoqqaat pillugit iliuusissatut pilersaarutip atuutilersinneratigut utoqqaat pillugit suliassat pingaartillugit suliaqarfigissammatigit, oqarpoq.
Ilaqutariinnut peqqissutsimullu ataatsimiititaliami amerlanerussuteqartut siunnersuutip akuersissutigineqarnissaa innersuussutigaat.
Amerlanerusut qaffaavigineqarneq malugissavaat
Naalakkersuisut nalunaareerput utoqqalinersiat qaffannerini inimut tapeqartitsinermi akunnattoorutinut aaqqiissutissanik 2023-p tungaanut misissuissallutik.
Demokraatilli, aamma Naleraq kiisalu Atassut isumaqarput, allannguutissatut siunnersuutip saqqummiutinnginnerani aporfissat akornutillu iluarsineqareersimasariaqartut, utoqqaat atugaat ingerlaannartumik pitsanngortinnissaat anguniarlugu.
Erseqqissaapput utoqqalinersiat qaffanneqarnissaat taperserlugu, iluaagaluguli tamatumunnga malitsigisaanik inimut tapit utoqqalinersiuteqartunut nikisinneqartarnissaat.
Siunnersuummi qaffasinnerpaamik siusinaartumik soraarnerussutisiaqartut aamma qaffaavigineqarput. Siusinaartumik soraarnerussutisiaqartut annerpaamik pisartagaqartut pisartagaat ukiumut 5.660 koruuninik qaffaavigineqarput, tassa qaammammut akileraarusiinnginnermi 470 koruuniulluni.
Allannguutissatut siunnersuut 1. juli 2022 atuutilissaaq. Inatsisartuni 22-t akuersillutik taasipput, sisamallu akerliullutik taasillutik.