Utoqqalinersiaqalernissamut katersallit isaatitsilluartut
Grønlandsbankenip Qimatut aqqutigalugu utoqqalinersiaqarnissamut aaqqissuussaatigut sullinneqartut 2021-mi iluanaarutit 30 procentii angullugit isertitaqarsimapput.
Inatsisartut utoqqalinersiuteqalernissamut pinngitsoorani katersisussaatitaaneq pillugu inatsimmik akuersissuteqarnerannut atatillugu Grønlandsbankenip utoqqalinersiaqarnissamut aaqqissuussaq Qimatut Pension ineriartortissimavaa.
Aaqqissuussaq pingaartumik sullitanit inatsimmik malinnikkusuttunut atorneqarpoq, aningaaserivillu naapertorlugu tamanna 2021-mi iluanaarutaasimavoq, tassa sullitat katersaat amerlingaatsiarsimagamik.
- Aningaasaliinermi kinguneqarluarsinnaasoq sorleq toqqarsimanera apeqqutaatillugu Qimatut Pensioninik
aningaasaliinermi iluanaarutit 5,5% aamma 30% akornanniipput. Aaqqissuussaq sullitatsinniit atorneqarnerpaasoq 16,73 %-mik iluanaaruteqartitsivoq. Aatsaat taama annertutigaaq, aningaaserivik tusagassiorfinnut nalunaaruteqarnermi oqaluttuarpoq.
Grønlandsbankenip januar 2022-mi sullitat kontoini 40 millioner koruunit sinnerlugit iluanaarutit nalunaarsorsimavai.
Aningaasaliisarnermut pisortap Klaus Trolle Pedersenip nunatsinni taamtut ineriartortoqarnera sullitanut Kalaallillu Nunaannut toqqissisimanartutut naleqarluartutullu nalilerpaa.
Toqqissisimanartumik ineriartortoqartoq
- ”Qularnanngilaq 2021-mi pisut sullitatsinnut amerlasuunut aningaasaqarnikkut toqqissisimanerulersitsisut. Taamatuttaaq nunatsinnut tamanna iluaqutaavoq, inuttaasut soraarninngornissaminnut aningaasaqarnikkut isumannaannerulermata. Ilimagisimanngilarput taama annertutigisumik qaffatsiginissaa, nuannaarutigaarpulli, Klaus Trolle Pedersen oqarpoq..
2021-mi aatsaat taamak annertutigisunik angusaqartoqareersoq, aningaasaliisarnermut pisortaq ukiumut 2022-mut naatsorsuutiginninnginneruvoq:
- Ukiumut 2022-mut isumalluarpugut naatsorsuuteqarpallaaratali kinguariarsinnaammat, soraarninngornissamulli katersagaqarnissaq siunissaq ungasinnerusoq pillugu eqqarsaataammat tamatuma eqqaamanissaa pingaaruteqarpoq, taanna oqarpoq.
Utoqqalinersiuteqalernissamut pinngitsoorani katersisussaatitaaneq pillugu inatsit atuutsinneqalermalli oqallisaasarsimaqaat. Kingullermik tamanna pivoq, 2022-mut aningaasanut inatsisissap isumaqatigiissutigineqarneranut atatillugu aaqqissuussami piumasaqaatit ilaannik sakkukilliliinissamik Inatsisartuni amerlanerussuteqartut akuersissuteqarmata.