Utoqqalinersiallit amerlanerulernerannit tatineqarneq annertusissasoq
Utoqqalinersiaqalersartut amerleriarujussuartussanngorput, sulisussameertoqarlunilu: - Ataatsimiititaliarsuit, periusissiat iliuusissatullu pilersaarusiat naammassineqanngitsut utoqqatsissutigineqarsinnaanngillat. Politikerit piviusunut anillakaattariaqarput, oqaatigineqarpoq.
Nunatsinni innuttaasut katitigaaneranni tupannartumik pisoqaqqajaalerpoq.
Utoqqaat sivisunerusumik inuusalersimanerat soorunami kikkunnit tamanit nuannaarutigineqarpoq, kisianni Kalaallit Nunaat »inuusuttut nunaattut« taaneqartarsimasoq naggataatigut tassaalersinnaavoq »utoqqaat nunaat«.
Aviisi AG taama allappoq.
Kisitsisinit takutinneqarpoq, 2010-mi 67-init 74-inut ukiulinni inuit 2.000-iusut, taakkua 2030-mi 3.700-nik amerlassuseqassapput. Utoqqaat 75-it sinnerlugit ukiullit marloriaatingajanngussapput, 80-illu sinnerlugit marloriaat sinnerlugu amerlassuseqalissallutik.
Taamaattumik assannik kissalaartunik suli amerlanerujussuarnik pisariaqartitsisoqassaaq, tamannalu Naalakkersuisunit nassuiaatini quppernerpassualinni marlunni saqqummersinneqaqqammersuni ersarilluinnartumik takutinneqarpoq (nuna tamakkerlugu pilersaarusiorneq pillugu nassuiaat aamma utoqqaat pillugit periusissiaq), atuassagaannilu politikeritut nukittuunik sianiuteqarfigisariaqartut. Maannakkorpiaq pissutsit ima saqqummiunneqarput:
- Oqaluttuarineqarpoq sulisussanik pissarsiniarneq ima ajornakusoortigisoq, ilaqutaasut aperineqartarlutik akilerneqarlutik ikiuussinnaanersut.
AG-p Inatsisartuni Ilaqutariinnermut Peqqissutsimullu Ataatsimiititaliami (utoqqarnik isumaginninneq taassuma ataaniimmat) siulittaasup tullia aperaa, tamanna ilisimasaqarfigineraa?
- Utoqqaat illuata akiliilluni ikiuunnissamik qinnuiginnissimanerannik toqqaannartumik tusagaqarsimanngilanga, kisianni taamaattoqarsimassappat eqqumiiginngilara, Anna Wangenheim (D) akivoq, ilaqutaasullu ajornartorsiutinik pisariusunik aaqqiiniarnermut suleqataanerat isumalluarnartuunerarlugu.
Aviisimi AG-mi atuarnerusinnaavutit. Aviisi uani pissarsiarisinnaavat:
