Utoqqalinersiallit 156-it politikerit neriorsuilussinnarnerannit eqqugaasut
Tamatuma akerlianik utoqqalinersiallit 2.008-t taamaallaat utoqqalinersiaminnik inuuniutissaqarput.
Inatsisartunut ilaasortat oqallinnerni ataatsimiinnermut aqutsisumit akuerineqarlutik issuakkanik atuisinnaapput, kisianni Biibilip Inatsisartut ataatsimiittarfianni issuarneqartarnera qaqutigoortuuvoq.
Aviisi Sermitsiaq taama allappoq.
Ukiakkulli ataatsimiinnermi illuatungiliuttuneersut arlallit isumaqarput, Naalakkersuisut utoqqarnut politikkiat Ivangkiiliumi Mathæusip allagaani kapitali 13-imi versi 12-imi allassimasut atorlugit pitsaanerpaamik oqaatigineqarsinnaasoq, tassani Jiisusip ajoqersukkani ima oqarfigimmagit:
– Peqartormi tunineqassaaq peqangaalersillugu; peqanngitsorli pigisamik allaat arsaarneqassaaq.
Utoqqarnut politikki pillugu oqallinnerni sivisuuni naleqartitanillu imaqartorujussuarni Jiisusip ilanngunneqarnissaanut tunngavilersuut tassaavoq, utoqqalinersiallit isumalluutitigut nukittuut inatsisit allanngortinneqarsimasut aqqutigalugit ukiortaamiit suliffeqaannarnermikkut aningaasarpassuarnik isertitaqarsinnaalernerat, akerlianilli utoqqalinersiallit sanngiitsut utoqqalinersiat 1,3 procentimik iluarsiissutaannik pissaqartinneqaannassallutik.
– Ajuusaarnarluinnartumik utoqqaat atukkamikkut ilaat imatut erloqinartigisumik atugaqalersimapput, allaat utoqqaat aappariit avittariaqartalersimallutik inuiaqatigiinni utoqqanngornerminni ikiorneqarsinnaannginnamik. Taamatut atugaqartitsinerput atugassaqartitsinerpullu utoqqarnut kangusuutigisariaqarput, Partii Naleqqap siulittaasua Hans Enoksen oqarpoq.
Piginnaaneqarnerpaat…
Inatsisartuni illuatungeriinnit tamanit oqaatigineqarpoq, utoqqalinersiallit assigiiaartuunngitsut, kisianni utoqqaat aningaasaqarnikkut atugarisaannut tunngasunik tigussaasunik kisitsisitaliisoqanngilaq.
Sermitsiap Aningaasaqarnermut Naalakkersuisoqarfik qinnuigisimavaa kisitsisinik naaatsorsueqqullugu, inerneranillu inuit 4.436-t Naatsorsueqqissaartarfiup kisitsisaatai naapertorlugit 2020-mi utoqqalinersialittut 66-inik ukioqalersussat akornanni naligiinnginnerup atuunnera uppernarsarneqarpoq.
Assilissap ersernerluttup kinguneranik, naalakkersuisoqatigiit Inatsisartunilu illuatungiliuttut ukiakkut ataatsimiinnerminni piffissap ilarujussuani paaseqatigiissinnaanatik oqaloqatigiipput.
Naalakkersuisoqatigiiusartut kingulliit sisamat, tamarmik Kim Kielsenimit Naalakkersuisunut siulittaasuuffigineqartut, utoqqalinersiat saniatigut isertitat apeqqutaatinnagit tamakkiisumik tunngaviusunik utoqqalinersiaqartitsilernissamik utoqqalinersialinnut tamanut neriorsuisarsimapput, kisianni utoqqalinersiat pillugit inatsisip allanngortinneqarnerisigut utoqqalinersiallit 533.688 koruunit sinnerlugit saniatigut isertitaqartut utoqqalinersiatik tamaasa annaasussanngorpaat.
Partii Naleqqameersoq Hans Enoksen neriorsuummik unioqqutitsinermik tamatuminnga sakkortuumik isornartorsiuivoq, Isumaginninnermulli Naalakkersuisoq Martha Abelsen inatsisip allannguutaanik illersuilluni.
– Neriorsuutinik unioqqutitsineq neriorsuutinik unioqqutitsineruvoq, Hans Enoksen oqarpoq.
– Inuiaqatigiinni atugarissaarfiusuni piginnaaneqarnerpaat ersugassanik oqimaannerpaanik ersuttussaapput, aningaasarsiakkaallu ajornartorsiutitaqanngitsumik imminnut pilersorsinnaapput, Martha Abelsen oqarpoq.
Aviisimi Sermitsiami, uani pissarsiarisinnaasarni, atuarnerusinnaavutit: