Utoqqalinersialinnut millionit aningaasaliissutaassapput – kisianni arriippallaartumik suliarineqarpoq, illuatungiliuttut oqarput
Pilersoqatigiinnissamut pisussaaffiup atorunnaarsinneqarnissaa Inatsisartut aalajangerpaat, taamaalilluni aapparisap isertitai naapertorlugit utoqqalinersiat naatsorsorneqartarnerat atorunnaassalluni. Atorunnaarsitsineq naligiinnginnermik annertunerulersitsissasoq nalilerneqarpoq, kisianni utoqqalinersiaqartitsinermi aaqqissuussaanermik pisariinnerulersitsissalluni.
Naalakkersuisut aningaasaliissuteqassapput – kisianni immaqa aatsaat 2025-mi.
Utoqqalinersiat naatsorsorneqarnerannut atatillugu pilersoqatigiinnissamut pisussaaffimmik taaneqartartup atorunnaarsinneqarnissaa Inatsisartut aalajangiipput. Inatsisip allanngorneqarnerani utoqqalinersialinnut saniatigut 8,2 millionit koruunit aningaasartuutigineqassapput.
Pilersoqatigiinnissamut pisussaaffiup atorunnaarsinneqarnissaanut siunnersuut utoqqalinersiaq aaqqissuuteqqinnissaannut annerusumi immikkoortumi ataatsimi Naalakkersuisut namminneq saqqummiuppaat, kisianni ataatsimut aaqqissuussinissaq suli naammassinngilaq, Naalakkersuisullu immikkoortup ataatsip akuerineqarnissaa ilalerpaat.
Naligiinnginneq annerulersissinnaagaa
Utoqqalinersiat taamatut naatsorsorneqartarnerisa atorunnaarsinneqarnissaata inuiaqatigiinni naligiinnginneq annerulersissinnaagaat, Naalakkersuisut ataatsimiittarfimmi oqaatigaa, tassami atorunnaarsitsinerup pingaartumik ilaqutariit qaffasinnerusumik akissarsiaqartut iluaqutsissammagit.
Illuanik pilersuisussaatitaanermik atorunnaarsitsinerup utoqqalinersiaqarnermik aaqqissuussap pisariinnerulersissavaa, kisianni sipaarutaasussat qanoq amerlatiginerat nalilerneqarsimanngilaq.
Siunnersuut upernaakkut ataatsimiinnermi Mariane Paviasenimit (IA) saqqummiunneqarpoq, aamma Jens Napãtôk´ assingulluinnartumik siunnersuuteqarpoq. Siunnersuutit ataatsimoortillugit suliarineqarput, Inatsisartunilu isumaqatigineqarluarput.
Siullermik amerlanerussuteqartut inatsisip allannguutissaa ukiumi nutaami atulertussanngorlugu akueriniaraluarpaat.
Naalakkersuisulli inatsisip allanngorneqarnissaanut piffissaqarnerunissaminnik qinnuiginnipput, upernaakkullu 2024-mi ataatsimiinnissamut inatsisissatut siunnersuummik saqqummiussaqarnissaminnut piffissaqartinneqarput.
Siunnersuuteqartup Mariane Paviasenip Naalakkersuisut sukkanerusumik sulinissaannik kaammattorpai:
- Neriuppunga siusinnerusukkut saqqummiunneqassasoq. 2024-mi atuutilersinnaassappat pitsaassaqaaq, Paviasen oqarpoq.
Naleqqamit isornartorsiuineq
Siunnersuuteqartup aappaa Jens Napãtôk´, Naalakkersuisut inatsisip allanngortinneqarnissaanut ukiumik ataatsimik atuinissaat isumaqatiginngilluinnarpai, ukioq mannalu ulluliisoqassasoq siunnersuutigaa, taamaalilluni utoqqalinersiaqartut kingusinnerusukkut kingumoortumik aningaasanik pissarsiaqarsinnaanngorlugit – kingusinnerpaamik 1. januar 2024-mi.
- Aatsaat 2025-mi piviusunngortinneqartariaqanngilaq, Jens Napãtôk´ oqaluttarfimmit oqarpoq.
Siunnersuutip aningaasanut inatsisissatut siunnersuutinut isumaqatiginninniutaasussanut ilanngunneqarnissaa, Naleqqami politikerip neriuutigaa, taamaalilluni aningaasat nassaarineqarlutillu atulersitsinissaq siuartinneqarniassammat.