Utoqqaat pillugit suliassaqarfimmi maalaarutit isornartorsiuinerillu Kommuneqarfik Sermersuumi politikerit pimoorussillutik suliarisarpaat. Kommunalbestyrelsimut ilaasortap Inge Olsvigip (IA) tamanna Sermitsiaq.AG-mi naqissuserpaa.

- Aalajangerpugut Atugarissaarnermut Suliffeqarnermullu Ataatsimiititaliamiit utoqqarnut pitsaassusissat misissuiffigeqqinniarlugit, taamaalilluta innuttaasut assigiinngitsunik peqquteqarlutik pisariaqartitaminnut pitsaanerusumik ikiorneqarnissaannut qulakkeerinnissinnaagatta, taanna oqarpoq.

Utoqqarnut pilersaarut politikkikkut anguniakkat aallaavigalugit sooq aamma qanoq iliorluni utoqqarnik sullissinermik ukiuni tulliuttuni (2016-2026) ineriartortitsinissamik allaaserisaqarfiusoq kommunip akuerisimagaa, Inge Olsvig ilisimatitsivoq. Tamatuma saniatigut aamma utoqqarnut pitsaassusissat, utoqqaat ikiorneqarnissaannut aningaasaliisoqartussaatillugu malinneqartussat suut tunngavigineqartarnissaannut nassuiaaffiusut pigineqarput.

92-inik ukiulik pillugu suliami kukkusoqanngitsoq

Taamaattumik arnap 92-inik ukiullip kræftertup utoqqaat illuanni eqqissisimaarfittut immikkoortortameereerluni angerlartinneqarnera pillugu suliaq, Sermitsiaq.AG-p allaaserisimasaa malittarisassap malillugit ingerlasimasoq, taassuma naqissuserpaa.

- Suliaq pineqartoq qanigisaasut naliliinerusimasut pillugit maalaaruteqarfigisaannit kisiartaanngitsoq eqqumaffigaarput, sulianilu ataasiakkaani takutinneqarpoq, utoqqaat assigiinngitsunik peqquteqarlutik annertunerusumik ikiorserneqarnissamik pisariaqartitsisunut pitsaanerusunik suliniuteqarnissarput pisariaqartoq.

Kommunimi politikerip oqarnera naapertorlugu, piartortunut katsorsaaviit, innuttaasut piartuutigisaminnik napparsimasut pisariaqartitaannik annertunerusumik naammassinniffiusinnaasut pisariaqartinneqarnerat unammilligassat ilagaat.

Tamatuma peqatigisaanik allanik allannguisoqanngippat, tunngavissanik qasukkaaneq imminerminni annertusunik naleqalersitsisussaanngitsoq, taanna isumaqarpoq.

- Tassami tamanna utoqqaat angerlarsimaffiini imaluunniit sungiusarfinni qasuersertarfinnilu inissat tassanngaannaq amerlinerinik kinguneqarsinnaanngilaq. Akerlianik utaqqisut allattorsimaffiat takinerulertussaavoq, taanna oqarpoq.

Naalakkersuisut oqaloqatigissagaat

Utoqqaat ullutsinni siornatigumut sanilliullugu sivisunerusumik inuusartut, kommunimi politikerip oqaatigaa, utoqqaallu amerliartuinnarput. Taamaattumik utoqqaat pillugit suliassaqarfimmi pissutsinik nukittorsaataasinnaasunik suliniutinik arlalinnik kissaateqartoqarpoq, taanna oqaluttuarpoq.

- Kommunimi utoqqarnut sullissiveqarusuppugut, Naalakkersuisunullu assatsinnik isaassivugut, unammilligassaq taanna suleqatigiilluni qanoq aaqqiivigineqassanersoq oqaloqatigiissutigerusukkatsigu.

2023-mi utoqqarnut sullissinermut aningaasaliissutit 4 millioner koruuninik ilaneqarnissaat missingersuusiarineqarpoq, taakku ilaatigut kommunit suliaanni inissarsiuussisarnermi suliniutinut nukittorsaataassapput.

Aammattaaq qanoq iliorluni atugarissaarnissamut teknologii atorlugu innuttaaqatitsinnut utoqqarnut piffissaqarnerulernissarput qanilaarnissamullu isumalluutissaqalernissarput aallunneqarpoq, Olvsig ilisimatitsivoq.