Utoqqaat illuani coronamik tuniluuttoqarnera pasineqartoq

Kommune Qeqertalimmi aalajangerneqarpoq Aasianni utoqqaat illuani pulaarsinnaasut killilerneqassasut. Utoqqaat illuani najugaqartuni tunillatsissimasunik paasisaqartoqarpoq.

Kommune Qeqertalik tusagassiorfinnut nalunaaruteqarluni ilisimatitsissutigaa Aasianni utoqqaat illuanni killilersuuteqalersoq.

Utoqqaat illuani Covid-19-imik tunillaassuuttoqalernera pasitsaanneqarsimavoq.

Covid-19-imut killilersuutit Naalakkersuisunit atorunnaarsinneqareeraluarput. Kommune Qeqertalilli aalajangerpoq sillimaniarneq pissutigalugu killilersuutinik atuutsitsisoqalersoq, kommunimi sulisoq ilisimatitsivoq.

Kommuni Facebookimini ilisimatitsivoq utoqqaat illuani najugaqartut tamarmik qanigisaminnit ataatsimit pulaartoqarsinnaasut, pulaartussarlu sioqqutsisumik sulisunut ilisimatitsisassasoq.

Pulaartut tamarmik tunillaassuuttoqannginnissaa pillugu qanermut kiinnamulluunniit assiaquteqartarnissaat piumasaqaataalerpoq.

Kommunimit nunattalu nakorsaaneranit pisut pillugit Sermitsiaq.AG oqaaseqartitsiniaavoq.

Nakorsaaneq pisumi ilisimasaqanngilaq

Nunatta Nakorsaanera Henrik L. Hansen ilisimatitsivoq Aasianni utoqqaat illuani susoqarneranik nunatta nakorsaaneqarfia ilisimatinneqarsimanngitsoq.

- Kommunit namminneq aalajangersinnaavaat qanoq isiussanerlutik, aamma uagutsinnut nalunaartariaqavinngillat. Pisumiilli pisumut assigiinngitsunik nalilersuisoqarsinnaavoq, Henrik L. Hansen oqarpoq.

Taanna ilisimatitsivoq maaji qaammat tamaat nuna tamakkerlugu aqqanillit tunillatsissimasut nalunaarutigineqarsimasut. Tunillatsissimasuni Aasianniittoqanngilaq.

Powered by Labrador CMS