Utoqqaat illersuisuat: Utoqqaat nunaqarfinniittut pillugit politikerit iliuuseqanngippallaarput
Nunatsinni utoqqaat atugaat assigiinngiiaarluinnarput. Politikkikkut suliniutit utoqqarnit nunaqarfinniittunit malugineqarpianngillat, utoqqaat illersuisuat taama isumaqarpoq.
- Utoqqaat nunaqarfinni sumiiffinnilu avinngarusimasuniittut inuunerannik
pitsanngorsaanissamut politikkikkut suliniutit erseqqaserluppallaarput.
Utoqqaat illersuisuata Inga Egedep, Naalagaaffiit Peqatigiit Nunarsuaq Tamakkerlugu Utoqqarnut Ullorititaani 1. oktober tusagassiorfinnut nalunaarutini taama aallarnerpaa.
Utoqqaat illersuisuata piumasaraa utoqqaat atugaat pitsanngorsarniarlugit politikerit ersarissunik malunnaatilinnillu suliniuteqartariaqalersut.
Naligiissitaaneq qulequtaralugu
Naalagaaffiit Peqatigiit nunarsuaq tamakkerlugu utoqqarnut ullorititaa 1. oktober ukiut tamaasa aalajangersimasumik qulequtaqartarpoq. Ukioq manna “Qanorluunniit
ukioqaraluaraanni naligiinnerulernissamut aqqut” qulequtaritinneqarpoq.
- Qanorluunniit ukioqaraluaraanni aamma sumiluunniit najugaqaraluaraanni
naligiinnerunissamut aqqutissiuisoqassappat, Kalaallit nunaanni utoqqarnut sumiiffinni
avinngarusimasuniittunut nunaqarfinniittunullu pissutsit pitsanngorsarnissaannik
politikkikkut pitsanngorsaasoqartariaqarpoq, Inga Egede oqarpoq.
Utoqqaat Illersuisuata oqaluttuaraa utoqqaat nunaqarfinni najugaqartut sanngiillisimatillugit napparsimalersimatillugilluunniit piumasaat malinnagu illoqarfinni qaninnerusuni utoqqaat illuanut nuutsinneqartartut. Nunaqarfinnimi utoqqarnut sullissisinnaasut amigaatigineqarput.
Utoqqaat najugartik qimallugu nuutsitaasartut
- Nalunngilara utoqqaat sanngiinnerit napparsimasullu nunaqarfinniit sumiiffinniillu
avinngarusimasuniit illoqarfinni utoqqaat illuinut pinngitsaalillugit nuutsinneqarnissaat
pisariaqartartoq. Kisianni taamaassappat, politiikeritta aamma qulakkeertariaqarpaat,
utoqqaat illoqarfinni utoqqaat illuinut nuutsinneqartut pitsaanerpaamik
sinaakkuteqassammata inuunermillu nalituumik tunineqassallutik, Inga Egede oqarpoq.
Utoqqaat peqqissusaat pillugu misissuititsinerup 2019-imeersup takutippaa utoqqaat arlallit kiserliornermik misigisartut. Utoqqaat nunaqarfinneersut, illoqarfinneersunut sanilliullugu kiserliornerusut paasineqarsimavoq.
Utoqqaat Illersuasuata erseqqissarpaa utoqqaat avinngarusimasuneersut nunaqarfinneersulluunniit utoqqaat illuannut nuussimasut ilaquttaminnik takunninnissamut periarfissagissaarnerusariaqartut.