Utoqqaat illersuisuat: Suliaq ajoraluartumik kisiartaanngilaq
Utoqqaat illersuisuat Inga Egede innuttaasunit utoqqaat pillugit saaffigineqakulavoq, utoqqaat illuinilu pulaartarnermini aamma utaqqisoqangaatsiarnera maluginiarpaa. Nunarput ukioqqortusiartunut piareersartariaqalerpoq, isumaqarpoq.
Arnaq 92-inik ukiulik ilaqutaalu misigisimapput innuttaasup pisariaqartitai tusaaniarneqarsimanngitsut utoqqaat illuannut inissinnissaanut piumasaqartaraluarneq kommunimit qisuariarfigineqanngimmat.
Kommuneqarfik Sermersuumi utoqqaat pillugit immikkoortortaqarfimmi pisortaq, Arnannguaq Heilmann Christensen ilanngullugu ilisimatitsivoq Nuummi utoqqaat illuinut marluusunut utaqqisut 22-usut.
Assiliaq taama ittoq utoqqaat illersuisuata Inga Egedep ilisarisinnaallugu Sermitsiaq.AG-mut oqaatigaa.
Taanna innuttaasunit, utoqqaat pillugit saaffigineqakulavoq. Utoqqaat illuilu illuinnarni aamma attaveqarfigilluartuullugit.
- Suliaq ajoraluartumik kisiartaanngilaq. Sineriammi utoqqaat illuinut attaveqartarnikka aallaavigalugu oqarsinnaavunga sineriammmi utoqqaat amerlasuut utoqqaat illuini inissinneqarnissaminnut utaqqipput, utoqqaat illersuisuat Inga Egede Sermitsiaq.AG-mut oqarpoq.
Naalakkersuisut utoqqaat pillugit misissuinerat nutaajunerusoq takutitsivoq nuna tamakkerlugu utoqqaat illuinut utaqqisut 2019-imi 176-iusimasut.
Utoqqaat illersuisuata oqaatigaa utaqqisut amerligaluttuinnassasut, puiguttortunngortullu aamma amerliartornerat maluginiarsimallugu.
Utoqqaat illui piartorfittut atorneqartut
Utoqqaat illersuisuat 2022-mi angalanermini utoqqaat illuini pissutsit nammineq takusaqarfigisimavai. Upernavimmut angalanermit nalunaarusiami nassuiarneqarpoq utoqqaat illuanni najugaqartut 19-iusuni 18-it nunaqarfimmeersuusut. Ataaseq kisimi Upernavimmi najugaqavissuuvoq.
Utoqqaat illuani allami pissutsit allaanerusut aamma maluginiarsimavai.
- Ilisimasaqarpunga utoqqaat illuani najugaqartinneqartumik napparsimanini pissutigalugu piartortumik. Utoqqaat pisinnaajunnaarnerusut soorunami paaqqutarineqarluarput. Taamaattoq utoqqaat pisinnaanerusut nammineertitaanerupput, paaqqutarineqarnerat annikinnerulluni, Inga Egede oqarpoq.
Taassuma ilanngullugu oqaatigaa utoqqaat illuani inissaaruttumik napparsimmavimmut inissiinnarneqarsimasumik aamma ilisimasaqarluni.
Nunarput piareersartariaqarpoq
Arlallit oqaatigisareerpaat. Innuttaasuni ukioqqortunerusut amerliartussapput. 2030-milu maannakkumiit utoqqaat soraarnerussutisiaqalereersimasut 1800-nik amerlanerussapput, tassa innuttaasut 65-ileereersimasut ukiut arfineq-marluk qaangiuppata 5900-iussangatinneqarlutik.
- Ukioqqortuneruleriartorpugut, utoqqaallu amerlaneruleriartussapput. Utoqqalineq isumaqanngilaq sanngiinnerulissasugut. Taamaattorli inuiaqatigiit utoqqaqarnerulernissamut piareersartariaqarput, utoqqaat illuinut utaqqisut amerlavallaalinnginniassammata, Inga Egede oqarpoq.
Innuttaasut saaffiginnissutaat 2022-meersut pillugit naatsorsuutit suli naammassinngitsut, utoqqaat illersuisuat ilisimatitsivoq.