Utaqqisut avaqqutiinnarlugit inissarsissunneqartut
Naak Nuummi inissaaleqisoqaraluaqisoq Munck-gruppenimi sulisut ilaat piffissaq sivikitsoq atorlugu kommunip inissiaatileqatigiiffianit Iserit A/S-imit inissaminnik tunineqarput
Munck Gruppenimi sulisut mittarfiup eqqaani sulisunut inissiani tamakkerlutik ineqartinneqassanngillat. Sulisut ilaat 10-12-it annermik annerusumik pilersaarusiornermik aqutsisut, pitsaassutsimik suliaqartut teknikerillu inissiani Nuummi Ceresvejimiittuni inissiaatileqatigiiffimmit Iserimmit neqeroorfigineqarsimapput. Tamannalu tupigusuutigineqarsinnaavoq, sanaartugassanimmi suliakkerneqartartut allat sulisuminnut inissanik pissarsisinnaanissaq ajornakusoortittartorujussuummassuk. Soorlumi aamma innuttaasut nalinginnaasut inissaminnik pissarsiniarlutik ukiorpassuarni utaqqisuniittariaqartartut.
- Uppernarsarsinnaavara Kommuneqarfik Sermersooq ikiorlugu Munck Gruppenimi sulisut ilaannut, Nuummi mittarfilioqataasussanut inissanik nassaarsinnaasimagatta, Iserit A/S-imi pisortaq Torben Kortegaard oqarpoq.
Inatsisinik unioqqutitsisoqanngitsoq
– Suliffeqarfiit sulisuminnut inissarsiortut ilaanneeriarluta ikiortarpavut. Inatsisartut peqqussutaanni §5 naapertorlugu attartornermut aamma innersuussisarnermut malittarisassat naapertorlugit taamaaliorsinnaavugut, tassanimi utaqqisunut allattorsimaffinnut atatillugu pingaarnersiuinernut tunngasorpassuarnik imaqarami, taamaalilluni siunertat ilaat allanit pingaarnerutinneqartarlutik. Soorlu kommuni suliffimmut atatillugu inissiamik innersuusserusuppat, tamanna innersuussanit nalinginnaasunit pingaarnerutinneqassaaq. Kommunip siunertat ilaat pingaarnerutinneqassasut toqqarsinnaavai, soorlu suliffeqarfiit kommunimut ikiuillutik illoqarfimmik ineriartortitseqataasut.
Allaaserineqartoq aviisimi Sermitsiami atuarneqarsinnaavoq. Aviisi uani pisiariuk: