Utaqqeruloorneq: Nalunaaquttap akunnerini arfineq-marlunni utaqqisimasoq
Nakorsamut sianerluni utaqqisarneq inuit ilaannut tinnaalersitsisinnaavoq. Politikkerip ataatsip utaqqeruloorneq nammineerluni misigisimavaa
Utaqqisuni – nummer – kingullersaavutit!
Inuppassuit nakorsiartarfimmut sianerniarsaraluni nukillalaarnarsinnaanera ilisimavaat. Oqarasuaatit sianiinnaavittut, peqqinnissaqarfimmilu sulisut allat utaqqisunik ikilisaaniarlutik ulapputtut, utaqqinerli innuttaasumut oqaluussiniarluni taqqisumut naassaanngitsutut misinnarsinnaavoq.
Atassutip siulittaasua, Siverth K. Heilmann, tamanna pillugu aperiinnarsinnaavarsi.
Ukiorpassuarni politikkeriusoq 66-inik ukiulik, sapaatip akunnerata siuliani qiterlulluni itersimavoq, nammineerlunilu atisalersorsinnaasimanngilaq.
Mobiini tigoriarlugu sianerpoq iluatsitsillluarnissaminik neriuuteqarluni:
- Oqarasuaatikkut oqaluussiniarlunga nalunaaquttap akunnerini pingasuni utaqqivunga, nakorsiartarfimmullu apuukkama nalunaaquttap akunnerini sisamani utaqqeqqillunga!
Peqqinnissaqarfimmut tunngatillugu akisussaanerpaaq, Naalakkersuisoq Martha Abelsen Inatsisartunit apersorneqarmat, Siverth K. Heilmannip peqqinnissaqarfiup tungaanit – misigisimasani – ingerlateqqillugu oqaluttuaraa. Siverth K. Heilmannip nammineerluni misigisimasaa toqqaannartumik oqaaseqarfiginngilaa, neriorsuutigaali pitsanngorsaasoqassasoq. Pitsanngorsaallunilu suliaqartuartoqartoq oqaatigalugu.
- Utaqqisartut ikilisarniarlugit immikkut ittumik suliniuteqarsimavugut. Nakorsalli amigaataajuarput, aamma allannguisarnerit ullormiit ullormut iluatsiffiuneq ajorput, oqaluttarfimmiit taamatut oqarpoq.