Skip to main content

Usisaat: Inuunermi suliffeqarfittut ingerlataq ineriartorteqqinneqarnissamut piareerpoq

Ilaqutariit nutserinermi assartuinermilu suliffeqarfiutaat, Usisaat, kinguaariit tulliinit ingerlanneqalissaaq, tassunga peqatigitillugu Væksfonden aamma Greenland Venture piginneqataasunut ilanngunneqarput

Aappariit Hans Gerstrømip aamma Akisooq Poulsenip suliffeqarfiutigisartik – Usisaat, nuna tamakkerlugu sullissisartoq – meeqqaminnu marlunnut, Arnannguaq Gerstrømimut aamma Minik Gerstrømimut ingerlatassanngortissimavaat, taakku pisortaanertut pisortallu tulliatut taaguuteqalissapput.

Ukiut sisamat sinnerlugit suliffeqarfimmik ingerlatsisimaneq, suliffeqarfiup siunissami qanoq ingerlanneqarnissaa 70-inik ukioqangajalivinnermi eqqarsaasersuutigereerlugu taamaalilluni naammassineqarpoq, Hans Gerstrøm Sermitsiaq.AG-mut oqaluttuarpoq.

Ministeriunermit ikiorneqarsimaneq

Kinguaariit nikinnissaat pillugu ataatsimeeqatigeeqqaarneq 2015-imi maajip qaammataani Future Greenlandip ataatsimeersuartitsinerani pivoq, tamatuma kingorna ministeriuneq aningaasarpassuarnik nassarluni Nuummut tikeriasaarpoq.

Familien Gerstrøm ses her sammen med repræsentanter fra Vækstfonden og Greenland Venture
Leiff Josefsen

- Ministeriuneq Lars Løkke Rasmussen qutsavigerujussuarpara, Hans Gerstrøm qungujulluni oqarpoq, innersuussutigalugillu 200 millioner koruunit, danskit naalagaaffiata Kalaallit Nunaanni inuussutissarsiutinik siuarsaaniarnermut naalagaaffiup timmisartoqarfiliornissamut akuutinneqarnermini tunniussimasai.

21 procentimik piginneqataaneq

Vækstfonden aamma Greenland Venture 21 procentimik piginneqataalernissaq siulersuisunilu ilaasortanngornissaq siunnerfigalugit suliffeqarfimmut katillugit 20 millioner koruuninik aningaasaliissuteqarsimapput.

Usisaat 20 millioner koruuninik aningaasaliiffigineqarnermigut, katillugit 100 millioner koruunit atorlugit aningaasaliiffissarsiorsinnaanngorpoq, ilaqutariit suliffeqarfimmik alliliinissamik anguniagaat naammassiniarlugu, tassani Nuup umiarsualiviani nutaamik qullersaqarfeqalernissaq anguniagaalluni.

Umiarsualivimmi 5200 kvadratmeterisut angitigisumik illorsualiornissaq qitiulluinnartussaavoq, Arnannguaq Gerstrøm tusagassiortunik naapitsinermi qatanngutini Minik peqatigalugu nerriviup isuani issiasoq, taamalu suliffeqarfimmi kiap oqaaseqartartuuneranik takutitsisoq oqaluttuarpoq. Ataataasoq Hans saniani oqaaseqallattaarpoq takkussimasunik illartitsisarluni.

RAL-imit anginerusoq

- Aap, quersuassartaa ima angisitigut katillugit 16-inik isertarfeqartussaalluni, taakkunannga tallimat biilinit ingerlaffigineqarsinnaassapput. Royal Arctic Line marluinnarnik taamaattuuteqarpoq​​​​​, qungujorussuarluni aamma Namminersorlutik Oqartussat umiarsuaatileqatigiiffissuanit anginerusumik pisaartussaanini tulluussimaarutigalugu oqarpoq.

Suliffeqarfiup ukiut ingerlaneranni kiffartuussissutigisartakkani annertusisimavai. Pequtinik assartuisarneq, umiarsuakkut nassiussisarneq, biilinik suliarinnittarneq nioqqutissanullu toqqorsiveqarneq suliat ilaannaraat kaaviaartitsinermik pilersitsisartut 100-ngajalluinnarnillu sulisoqartitsisut.

På dette areal er man i gang med at bygge 5.200 etage-kvadratmester stort lagerhal og domicil.
Leiff Josefsen

- Suliffeqarfiit allat sullissinnaaniarlugit quersuaqarnitta ineriartortinneqarnissaa pilersaarutigaarput. Aap, allat nioqqutissaatiminnik uninngasuuteqarsinnaanerannik neqerooruteqarnissaq pilersaarutigaarput, aammali ingerlasussanik piareersaallunilu aqutsisinnaanneq neqeroorutiginiarparput. Allat aamma periarfissinneqassapput ulloq unnuarlu quersuatsinnik attartorsinnaanermut, Arnannguaq Gerstrøm Usisaammi suliarineqartartut ullumi illoqarfimmi assigiinngitsuni arfinilinni siammarsimasut ataatsimoortilernissaannut qilanaaruteqartoq ilisimatitsivoq.

Sanasut ukkatarineqarnissaat

Qatanngutaata Minik Gerstrømip biilinut tunngatillugu kiffartuussisarnerup inerisarneqarnissaa immikkut ukkatariniarpaa, tassa suliffeqarfik sanasut biilinik assartuutaasartunik allanillu sisamanik assakaasulinnik sanaartornermi pinngitsoorneqarsinnaanngitsunik sullissisinnaanngortinniarlugu

- Taamatut angusaqarniarluni sulineq sivisullunilu assoroornarsimavoq. Pissanganarlunilu ilinniarfiusimaqaaq, pisortaaneq, angajoqqaat angerlarsimaffianni aalajangiisoqartarunnaarluni siulersuisuni aalajangiisoqartalernissaanik sungiussiniartussaq ilisimatitsivoq.

- Nuliaralu nuannaarutigiinnarsinnaavarput marlunnik meeraqaratta suliffimmik ingerlatitseqqinnissamut piginnaasaqarlutillu soqutiginnittunik. Tamanna qujamasuutigaarput, Hans Gerstrøm siulersisuni ilaasortaqatissaminik nutaanik suleqateqarnissamut qilanaartoq oqarpoq.

Siulersuisut nutaat

Siulersuisut ukunannga inuttaqassapput:

Hans Gerstrøm, COB, Siulersuisuni siulittaasoq

Mogens Andersen, Greenland Venture / Vækstfonden

Minik Gerstrøm, VP, Pisortap tullia

Hardy Petersen (tidligere koncern direktør og bestyrelsesmedlem for LEMAN A/S-imi siusinnerusukkut pisortaasimasoq siulersuisunilu ilaasortaasimasoq)

Søren Moll (Danmarkimi biilini tuniniaasartoq)

Hans nulianilu Akisooq suliffeqarfimmi ulluinnarni sulisarnerminnik ingerlatsiinnassapput.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER